“Зэлэм” компаний Ш.Бат-Ирээдүй, С.Жаргалсайхан нар гэмт хэргийн замаар олж авсан орддоо “Берун майнинг”-аар 40 сая төгрөгийн хөрөнгө оруулалт хийлгэжээ
Нийтэлсэн: 2015-03-10 02:25:30
АМГ-ын дарга асан Д.Батхуяг болон түүний найз гэгдэх С.Жаргалсайхан, Ш.Бат-Ирээдүй нартай холбоотой шинэ нөхцөл байдал илэрсээр байна. Д.Батхуяг нь 2008 онд "Саусгоби сэндс" компаний эзэмшлийн ашигт малтмалын тусгай зөвшөөрлийг цуцлах үүргээ хэрэгжүүлэлгүй нь харин ч хясан боогдуулах замаар "Саусгоби сэндс" -ийн эзэмшилд байсан, орон нутгийн тусгай хэрэгцээнд авагдсан Өмнөговь аймгийн Гурвантэс, Ноён сумдын нутаг дахь “Хайрхан толгой” нэртэй 72499 гектар талбай бүхий (42.867.979 тонн чулуун нүүрсний нөөцтэй) ашигт малтмалын 5261X тоот тусгай зөвшөөрлийг өөрийн найз С.Жаргалсайханы "Зэлэм" компанид шилжүүлсэн нь тогтоогдсон. С.Жаргалсайхан энэ тухай мэдүүлэхдээ "Батхуяг бид хоёр олон жилийн найзууд, тухайн үед таньдаг Өвөрмонгол хүн ирээд найдвартай нөөцтэй газар байна уу, хамтарч ажиллая гэсэн, тэр үед Батхуяг Ашигт малтмалын газрын дарга болчихсон байсан учир мэдээлэл өгч туслаач гэсэн, 2009 онд “Саусгоби сэндс”-ийн буцааж өгөх гэж байсан хоёр ч лицензийг худалдаж аваад юу ч илрээгүй тул буцааж өгч байсан, “Саусгоби сэндс” лиценз зарах гэж байгааг Батхуягаас сонссон, Батхуяг сонирхож үзэхгүй юу, дараа нь битгий юм гарсангүй гээд байгаарай гэхээр нь ач холбогдол өгөөгүй. түншүүд сонирхохоор нь Бат-Ирээдүйг уулзаад ир гэж явуулахад 36 сая төгрөгөөр зарна гэсний дагуу Бат-Ирээдүйд мөнгө байгаагүй болохоор би 25 мянган доллар гаргаж уг лицензийг худалдаж авсан” гэжээ. "Зэлэм"-ийн захирал Ш.Бат-Ирээдүй 53, С.Жаргалсайхан нь 47 хувийн хувьцаа эзэмшигч байж. Харин “Берун майнинг” нь “Зэлэм” ХХК-ийн 53 хувийн хувьцааг Ш.Бат-Ирээдүйн эхнэр Г.Энхтүвшингөөс 2011 оны 6 дугаар сарын 13-ны өдөр гэрээний үндсэн дээр худалдан авчээ. Үүний дараа дээрхи талбайд “Берун майнинг” нь 100 хувь өөрийн хөрөнгөөр хайгуулын ажлыг хийж ихээхэн хэмжээний зардал гаргасны дүнд 42,867,979 тонн чулуун нүүрсний нөөцтэйг тогтоосон гэнэ. Улмаар 2012 оны 4 дүгээр сарын 12-ны өдөр АМГ-аас ашиглалтын тусгай зөвшөөрөл авах гэтэл АТГ зөвшөөрөл хүссэн өргөдлийг хавсарган өгсөн бүх эх материалын хамт Д.Батхуяг нарт холбогдох эрүүгийн хэрэгт хураан авч. Ингээд нөгөө 40 сая төгрөг замхрах тал руугаа оржээ. 2013 оны 1 дүгээр сарын сүүлээр АМГ-ын дарга асан Д.Батхуягийн хэрэгт холбогдсон “Зэлэм” ХХК-ийн захирал Ш.Бат-Ирээдүй, С.Жаргалсайхан нарт ял оногдуулуулснаас гадна “Берун майнинг”-ийн хөрөнгө оруулсан 5261X хайгуулын тусгай зөвшөөрлийг хээл хахуулийн аргаар олж авсан гээд хүчингүй болгосон гэнэ. Ийнхүү энэ компани Ш.Бат-Ирээдүй, С.Жаргалсайхан нар нь уг тусгай зөвшөөрлийг хууль бусаар олж авсныг мэдсээр байж биднийг хууран мэхлэх замаар “Хайрхан толгой” хэмээх ордод их хэмжээний хөрөнгө оруулуулан онц их хэмжээний хохирол учруулсан хэмээн бас цагдаад хандаж. “Берун майнинг” нь гэм хор учруулсны хохирол 40 сая, уг ордыг ашиглан олох ёстой байсан ашиг гэж тооцоолсон 650 сая төгрөгийг өдгөө АМГ-аас нэхэн сандаргаж байгаа гэнэ. Гэхдээ АМГ-ын дарга асан Д.Батхуяг, Ш.Бат-Ирээдүй, С.Жаргалсайхан нарт холбогдох эрүүгийн хэргийн байцаан шийтгэх ажиллагааны явцад хохирогч гэгдээд байгаа “Берун майнинг” болон “Зэлэм”-ийн алин ч оролцогчоор тогтоогдоогүй нь гайхалтай. “Зэлэм” уг ордод хөрөнгө оруулалт хийх санхүүгийн чадвар муутай байсан учир хайгуулын ажлыг “Берун майнинг”-аар гүйцэтгүүлсэн бөгөөд тухайн үед “Берун майнинг” нь “Зэлэм”-ийн хувьцааны 53 хувийг эзэмшигч болсон аж./үргэлжлэл бий/
NUUTS.mn
