“ITB Berlin-2015” буюу Монголд хоосон талаас өөр юу ч байхгүй
ХБНГУ-ын Берлин хотын “Ай-Ти-Би Берлин” олон улсын аялал жуулчлалын үзэсгэлэн болоод дуусаж байна. Энэ ажиллагаанд Монгол улс их ач холбогдол өгч төрийн тэргүүн нь нээж үг хэлсэн бол БОНХ-ийн сайд Д.Оюунхорол хуралдаан даргалсан бололтой. Тэрээр явахаасаа өмнө “Монгол Улсаас нийт 16 тур оператор компани, хоёр зочид буудал, 50 гаруй аялал жуулчлалын компани энэ арга хэмжээнд оролцоно. Арга хэмжээнд оролцсоны дараа Монгол Улсад ирэх жуулчдын тоо эрс өснө гэж тооцож байгаа. 2014 онд Монгол Улсад нийт 417 мянга орчим жуулчин ирсэн тооцоо бий. Энэ тоо эхний байдлаар 20-30 хувиар нэмэгдэнэ” гэсэн үүрэг амлалт авсан. Гэтэл жуулчдийг татах зүйлээ үзэсгэлэнд оноод үзүүлчихэж чадсангүй. Манай дарга нар энэ удаад “Онгон байгаль ба нүүдэлчид” нэртэйгээр оролцохоор шийдсэн гадаадын жуулчдыг татах бус харин ч цаашаа түлхсэн гэнэ. “Онгон байгаль ба нүүдэлчид” гэдэг нь өнөөх л улиг болсон сэдэв агаад үүний цаана Монголын хоосон тал эзгүй хээр, хэдэн мал малчид л байдаг гэсэн ойлголт гадныханд лавтай суусан байсныг л бүр лавшруулаад хаяж. Монгол улс онгон зэрлэг байгаль, нүүдэлчдийн эх орон гэдэг хаягаар хэдэн арван жил пиар хийлээ. Үр дүнд нь жуулчид нэмэгдсэнгүй харин ч тогтмол буурч байна. Д.Оюунхорол сайдын гайхуулаад байгаа “Онгон байгаль ба нүүдэлчид” гэдэг нь нэгэн хэвийн төрхтэй манай хөдөө агаад аялсан жуулчин нэг хоёрхон өдрийн даараа л уйдаг гэдгийг аялал жуулчлалынхан бүгд ярьдаг. Хааша ч харсан нэгэн янзын байгаль амьдралын ижил дүр зураг байхад уйдах нь аргагүй биз. Нүүдэлчдийн амьдралын онцлог сонирхолтой талыг олж гаргаж чаддагүйгээс морь уургалах, хонь гаргахыг л харуулахгүй бол өөр үзүүлчих юм алга хэвээрээ л байна. Мориор аялуулна гэдэг ч Монголд морь унасанаас Америкийн Техасын талаар давхих нь илүү сонирхолтой биз. Ийнхүү улиг болсон зүйлтэйгээ үхширтэл зууралдсанаас жуулчдыг яг юугаараа татахыг салбарын яам нь хүртэл тодорхойлж чаддаггүй болж. Жуулчдыг татах үзүүлэх зүйлгүй байж нэгхэн үзэсгэлэнд оролцоод 20-30 хувиар тоог нь өсгөнө гэж мөрөөдөөд яахав. Монголын баг “Онгон байгаль ба нүүдэлчид” сэдвээр оролцож байгаа нь гадаадын аялал жуулчлалын компаниудын сонирхолыг татахгүй байгаа бөгөөд очсон хүмүүсийн ярианаас үзэхэд эд нарт өөр үзүүлэх юм байхгүй дээ хэмээн харин ч шоолж байгаа гэнэ шүү.
NUUTS.mn
