ЗГХЭГ-ын дарга С.Баярцогтыг огцруулах асуудлыг ахин тавина
Г.Уянга, Х.Болорчулуун тэргүүтэй УИХ-ын таван гишүүн мэдээлэл хийв. Тэд сар шинийн өмнө Засгийн газрын хэрэг эрхлэх газрын дарга С.Баярцогтыг огцруулах асуудлыг тавьсан. Уг асуудлыг УИХ битүүний өдөр хэлэлцээд, С.Баярцогтыг огцруулах шаардлагагүй гэж үзсэн билээ. Дээрх гишүүд гадны компаниас зөвлөгөө авах нэрийдлээр 17 тэрбум төгрөг улсын төсөвт суулгасан, гарын үсэг зурсан Засгийн газрын хэрэг эрхлэх газрын дарга С.Баярцогтыг огцруулах асуудлыг дахин тавина гэж мэдэгдлээ. УИХ дээрх асуудлыг битүүний өдөр Үндэсний бөхийн тавын даваа эхэлчихсэн байх үед асуудал тавьсан гишүүдийг эзгүйд хэлэлцсэн учраас тогтоолын төслөө дахин өргөн барихаар болжээ. Мөн их хэмжээний татвараас зугтсан, Монголын хуулийг зөрчсөн АНУ-ын иргэн Жастин Капла нарыг уучилж болсон юм бол Монгол төрийн дархлаа болж явсан, байгаль орчны төлөө тэмцэгч, улсад нэг ч төгрөгийн хохирол учруулаагүй хэрнээ хорих ялаар шийтгүүлсэн Монголын гол нууруудын нэгдсэн хөдөлгөөний тэргүүн Ц.Мөнхбаярт уучлал үзүүлэх ёстой гэж үзэж байгаа аж. Тэд тун удахгүй Ц.Мөнхбаярт уучлал үзүүлэх хүсэлтийг Ерөнхийлөгчид албан ёсоор өгөхөөр төлөвлөжээ.
NUUTS.mn
