ЭМГЭНЭЛ
Нийтэлсэн: 2015-03-03 04:17:14
Монголын тайз дэлгэцийн урлагийн нэрт жүжигчин Цэвэгсүрэнгийн Батхуяг нь 2015 оны 02 сарын 27 ны өдөр хүнд өвчний улмаас таалал төгсөж бидэнд нөхөж баршгүй хүнд гарз тохиолоо. Цэвэгсүрэнгийн Батхуяг нь 1969 оны 03 сарын 27-нд Дорнод аймагт төрж, улмаар Дорнод аймгийн 2 дугаар 10 жилийн сургуулийг дүүргэж 1987-1989 онд Барилгын цэргийн 021 дүгээр ангид хугацаат цэргийн албыг нэр төртэйгээр хаажээ. 1995 онд СУИС-ийг жүжигчин мэргэжлээр төгсөж эдүгээ хүртэл тайз дэлгэцийн урлагт хоёргүй сэтгэлээр зүтгэхдээ өөрийн дундаршгүй их авьяас чадвараар дахин давтагдашгүй олон зуун дүрүүдийг бүтээсэн Монголын ард түмний хайртай хүү нь байлаа. Түүний бүтээсэн уран бүтээлийг төр засаг өндрөөр үнэлж МУСТА цол, Алтангадас одон, Хөдөлмөрийн гавьяаны улаан тугийн одонгоор тус тус шагнасан юм. Цэвэгсүрэнгийн Батхуяг таны суу их авьяас билэг, цайлган цагаан өрөвч нинжин сэтгэл, найрсаг хөгжилтэй зан чанар, үргэлж өөдрөг хүсэл тэмүүлэлтэй байдаг, гэгээн дүр төрх тань гэр бүл, үр хүүхэд, төрөл төрөгсөд анд найз, мэргэжил нэгт нөхөд, Монголын мянга мянган үзэгч түмнийхээ зүрх сэтгэлд тодоос тод гэрэлтэн үлдэх болно
Ум сайн амгалан байг.
