ХЯ-ны жолооч “Dream” зочид буудлаас 2.6 саяын “Longines” брендын цаг “өөд нь татжээ”
Нийтэлсэн: 2015-03-02 03:25:51
Санамсаргүй олсон эд зүйлийг завшсан гэх зүйл ангиар Хөдөлмөрийн яамын жолооч Х.Р нь 960 мянган төгрөгөөр торгуульжээ. Тэрээр Чингэлтэй дүүргийн 4-р хороонд байрлах Dream /Дреам/ зочид буудлын “Элэганс” саунаас 2.6 сая төгрөгийн үнэтэй “Longines” /Лонгинес/ фирмийн бугуйн цаг олоод завшсан гэж хэрэгт холбогджээ. Уг цагны эзэн нь бүр зочид буудлын эзний дүү байж таарчээ. Эзний дүү саунаар 8 цаг 15 минутын үед үйлчлүүлэхээр ороод гучин минутын дараа гарахдаа 2 номерийн хувцасны шүүгээнд Швейцарь улсад үйлдвэрлэсэн “Longines” фирмийн 24 кратын алтан шармал бугуйн цагаа мартаж гараад 3 цаг орчмын дараа гэнэт санажээ. Тэгээд шууд Чингэлтэй дүүрэг дэх цагдаагийн хэлтэст өргөдөл гаргасан гэнэ. Уг цагийг “Naran shop”-оос 2.6 сая төгрөгөөр худалдан авч байсан гэж мэдүүлжээ. Харин Хөдөлмөрийн яамны жолооч “би саунаас гарахаар шүүгээнээсээ хувцасаа авахад нэг цаг газар унасан байхыг харсан” гэж мэдүүлжээ. Уг нь зохион байгуулагчид өгнө гэж бодож байсан ч мартаад авч гараад бурууджээ. Гэртээ ирээд санасан ч ажил ихтэй байсан тул цагийг өгч чадахгүй явсаар удчихсан гэж үнэнээ өчжээ.
NUUTS.mn
