Халхын шоронд гар утас хэрэглэдэг хоригдол хянагчтайгаа зодолджээ
Нийтэлсэн: 2015-02-16 07:13:18
.jpg)
Шоронд гар утас хэрэглэдэг тухай яриа оргүй биш болох нь батлагдсан хэрэг гарчээ. Шүүхийн шийдвэр гүйцэтгэх газрын харьяа хорих 427-р ангийн хашаан дотор байрлах нийтийн бие засах газрын гадна хүмүүжигч А.М нь хянагч Л.Д-гийн “гар утас хэрэглэсэн байна, хураалга” гэсэн хууль ёсны шаардлага тавихад гар утсаа хураалгахгүй хэмээн маргалдаж хянагчид хүч хэрэглэн энгэрийн камерийг нь эвдэж. Энэ хэрэгт бас нэг хоригдол оролцон туслахаар өөр нэг хянагчийн нүүр лүү нь цохиж унагасан гэмт хэрэг үйлджээ. Дээрхи хэргийн улмаас нэг хянагчийн 370 мянган төгрөгний үнэтэй энгэрийн камер эвдэрчээ. Хянагч нар мэдүүлэхдээ “ хэрэг гардаг өдөр би харуулын бага даргаас өгсөн үүргийг хэрэгжүүлж ялтнуудад үзлэг хийсэн, энэ үед М-ийн өмдний салтаанаас хориотой эд зүйл болох гар утас гарч ирсэн, хураах гэтэл эсэргүүцэл үзүүлсэн тул ахлагч Б-г дуудан туслалцаа авсан, ингээд бид хоёр ялтнаас гар утсыг нь авч чадсан, харилцан ноцолдох үед ялтан М нь миний энгэрт байсан камерын утаснаас татаж унаган эвдсэн” гэжээ. Нүүрэндээ цохиулсан хянагч Б нь “хоригдолд гар утас байгааг хянагч М хэлэхэд бид хоёр хамжиж байж хурааж авсан, энэ үед өөр нэг ялтан О ирээд миний нүүрэн тус газар цохиж хамар хугалсан” гэжээ. Гар утастай байсан хоригдол хориотой эд зүйл хэрэглэж байснаа хүлээж. Тэрээр гар утсаа хураалгасан ч см картаа өгөхгүй гэж хянагч нартаа эсэргүүцэл үзүүлсэн гэнэ. Харин хянагчдаа гар хүрсэн хоригдол болсон явдлыг өөрөөр мэдүүлэн “бие засах газрын хажууд хянагч нар нэг хоригдолыг боож унагахад тэнд байсан ялтнууд наад хулгайчаа аллаа та нар гэж орилолдсон, боолгосон хоригдлын амнаас цагаан хөөс сахарч байхаар нь би боолтыг нь тавиулах гэж хянагчтай ноцолдсон, бид хэдий шоронд байгаа ч нэг нэг нэгнийгээ өмөөрөх учиртай гэж бодоод боолтыг тавиулах гэж хянагчийн нүүрэн тус газар цохьсон” гэж хэргээ хүлээжээ. Хоёр хоригдол хориотой эд зүйл болох гар утас хэрэглэсэн, хянагчийн хууль ёсны шаардлагыг эсэргүүцсэн, бие махбодод нь гэмтэл учруулсан хэрэгтээ эдэлж байсан ял нь дээрээ 1.3-1.8 жил тус тус нэмүүлсэн гэнэ.
NUUTS.mn
