17.5 тэрбумыг халааслагч “Painter law firm”-ын захирал нь “Алтангадастан” гэнэ
.jpg)
Америкийн гэр бүлийн эр эм хоёрын байгуулсан энэ хуулийн фирм “Эрдэнэс Оюутолгой” компанид хуулийн зөвлөгөө авах нэрийдлээр 17.5 тэрбум төгрөг авахаар болж урьдчилгаа 455 саяыг аль хэдийн халаасалж. Энэ нь маш сэжиг бүхий үндэслэлээр татвар төлөгчдийн мөнгө, төсвийн хөрөнгийг зориулалтын бусаар зарцуулсан хэмээн олон нийт хардаж байна. УИХ дахь бие даагчдын бүлэг энэ хэрэгт ЗГХЭГ-ын дарга С.Баярцогтыг буруутган түүнийг огцруулах асуудлыг өргөн барьсан. Харин сандарсан Сэлэнгийн улстөрч өмнөх дарга нар луу буруугаа чихэх нь тэр. Тэрээр Н.Алтанхуягийн Засгийн газар үед өндөр чадвартай, хууль санхүүгийн зөвлөх Роберт Пайнтерийг хөлсөлсөн бөгөөд өнгөрсөн хугацаанд хийсэн ажлынх нь хөлс болох 260 мянган ам.доллар буюу 455 сая төгрөгтэй тэнцэх хэмжээний санхүүжилтийг 2014 оны сүүлчээр шилжүүлсэн гэв. Үлдсэн санхүүжилтийг “Painter law firm”-тэй 2016 он хүртэл хамтран ажиллах гэрээний хугацаанд ажлын хөлс болгон шилжүүлэх бөгөөд ЗГХЭГ-ын дансанд байгаа аж. Ердөө хоёрхон хүнтэй энэ фирм 17.5 тэрбумын үнэ хүрэх зөвлөгөө өгч чадах уу гэдэг нь эргэлзээтэй. Хэдий өмнөх Засгийн үед байгуулсан тохироо гэж байгаа ч энэ нь эцсийн эцэст С.Баярцогтын “гайхмашигт” гэрээний балаг юм. Хэрвээ үнэхээр л гайхамшигтай сайн гэрээ байгуулсан бол ингэж засаж сайжруулах гэж төсвийн асар их мөнгийг гадныханд цацах шаардлага гарахгүй байсан. “Painter law firm”-ыг үүсгэн байгуулагч Роберт Пайнтер нь АН-ын улстөрийн дээд хүрээнийхэнтэй их ойр агаад аль хэдийн “Алтангадас” одонгоор энгэрээ цоолоод авсан нэгэн аж.
NUUTS.mn
