Жанжны толгойг залгисан “үлэг гүрвэлүүд” хэн бэ ?
Их жанжин Д.Сүхбаатарын мэндэлсний 122 жилийн ой өнөөдөр тохиож байна. Энэ баярыг МАН өмчилөн авч өргөн тэмдэглэдэг. Гэтэл их жанжныхаа тэмцэж зүтгэж байгуулсан улстөрийг мөхөөх, гадныхны гар хөл дуулгавартай зарц нь болох, байгалийн баялагаа харийнханд найр тавин өгөгчид энэ намаас зөндөө тодорлоо. Авилгал хээл хахуулын хэрэгт ард түмнээрээ цоллууллагсадын эхний эгнээнд мөн л энэ намынхан манлайлж явна. Экс ерөнхийлөгч Н.Энхбаяр Тавантолгойн ордын хэрэгт МАН-ын дарга асан С.Баяр, С.Батболд нарыг нэр цохон буруутгасан. Улстөрийн дээд түвшнээс албан тушаалаа урвуулан ашигласан хэрэгт Д.Дондог, Ц.Батбаяр нарын гишүүд нь холбогдон шүүхээр ял авлаа. Ялангуяа олон арван мянган гишүүдийнхээ эсэргүүцлийг ул хайхран АН-ын мэхэнд “автдагаараа” автан Шийдлийн хэмээх Засгийн газарт орсоноороо М.Энхболд, Ж.Мөнхбат, У.Хүрэлсүх, С.Бямбацогт нар нь “үлэг гүрвэл” болсон гэдгээ харууллаа. Тэд нарыг дагаад сайд болсон Ж.Эрдэнэбат, Д.Оюунхорол, Д.Цогтбаатар, Н.Төмөрхүү, С.Чинзориг нар ч гэсэн эдийн засгийн уналтын хүнд үе болох 2016 оны сонгуулийн үеэр намаа “нүүр хийх газаргүй, үг хэлэх эрхгүй” болгосон буруутнаар тодорно. Сайд нараа дагаад дэд сайдын суудалд шунан дурлагсадад ч гэсэн намын нэр хүндийг унагасан хатуу хариуцлагыг жирийн гишүүнд нэхэж таарна. Ийнхүү Ардын нам нь албан тушаал, нэр хүнд хөөсөн цөөн хэдэн бүлэглэлийн гарт орж Д.Сүхбаатар жанжны тунхаглаж байсан зорилгоосоо шууд урвасан үйлдлүүдээрээ Их жанжныхаа төрсөн өдрийг угтаж байна.
NUUTS.mn
