Нууц мэдээллийн уурхай

Сэлэнгэ аймгийн Мандал сумыг Канадын 100 хувийн хөрөнгө оруулалттай “Бороогоулд” компаний Бороогийн алтны уурхай ажиллаж байснаар нь олон нийт мэддэг. Тэгвэл “Бороогоулд” компани , Бороогийн алтны уурхайгаас дутахгүй “алдаршсан” хүн нь Мандал сумын Засаг даргаар олон жил ажилласан Х.Цээпилдорж байсан. Тэрээр “Бороогоулд”, дараа нь “Сетаррагоулд” компанитай сум орон нутгаа хөгжүүлэхээр “нягт хамтран” ажилласан гэгддэг. Олон жил засаг даргаар ажилласан Х.Цээпилдорж нь тухайн үедээ нутагтаа тэргүүн баянд тооцогддог байсан нь одоо ч хэвээрээ биз. Засаг дарга  зочид буудал , хөрөө рам, тоосго төмрийн үйлдвэр, газар тарилангийн компани гээд салбар бүр лүү орсон бизнестэй байсан. Нэгэн үе газрын маргаанаас болж малчнаа баривчлуулан хэсэгтээ л шуугианы эзэн болон мандаж байсан удаатай. Харин засаг даргаар ажиллаж байхдаа Хятадын хөрөнгө оруулалттай компаниас хоёр өрөө байр болон тоосгоо зарах нөхцлөөр газар олгосон  байж болзошгүйг 10 жилийн хорих ял авсан эмэгтэй шоронгоос задалжээ. Энэ нь 2008 оны явдал гэнэ. “Вольфганг” компаний захирал Д.Батцэцэг нь Хятадын хөрөнгө оруулалттай “Тун Жеү” компаний санхүүжилтаар Мандал сумын Зүүнхараа хотод 96 айлын орон сууц барихаар засаг дарга Х.Цээпилдоржид ханджээ. “Вольфганг” компаний захирал Д.Батцэцэг болон  Хятадын хөрөнгө оруулалттай “Тун Жеү” компанийг үүсгэн байгуулагч Шин Су Жин нарын хамтын ажиллагаа сайхан эхлээд саараар төгссөн аж. Одоо бүр эвлэршгүй дайсан болсон агаад хятад бизнесмэн нь монгол түншээ хууран мэхэлж бусдын өмчийг авсан хэмээн шүүх цагдаагаар явсаар байгаад эрүү үүсгүүлэн бүр 10 жилийн хорих ял өгүүлээд шоронд суулган санаа нь амарч. Д.Батцэцэг нь Шин Су Жиныг бизнес хийхээр Монголд ирэхэд нь “уургалаад” авсан бололтой. Бизнес хийхийн хажуугаар олон төрийн бус байгууллагийн тэргүүнээр ажилладаг, та бүхэнд Монголд бизнес хийхэд тань туслана дэмжинэ гэж итгүүлсээр байгаад Монгол талын ¹1 түнш нь болж итгэлийг олж авчээ. Д.Батцэцэг нь Х.Цээпилдоржтой хятад бизнесмэнийг уулзуулж орон сууцны барилга барих газрын зөвшөөрөл хүсэж. Мандал сумын цэнгэлдэхийн ойролцоо орон сууцны “Жаргалан” гэдэг хотхон барих газрын зөвшөөрөл яригдах үед  Д.Батцэцэгийн баталж байгаагаар Х.Цээпилдорж болон хятад бизнесмэн Шин Су Жин тэр гурвын хооронд нууц тохироо хийгджээ. Мандал сумын Засаг дарга баригдсан орон сууцнаас хоёр өрөө байр өгөх мөн өөрийн хувийн компаний үйлдвэрлэдэг тоосго, арматурын төмөр зэргийг барилга барихдаа худалдан авах гэсэн хоёр нөхцөл тавьжээ. Хятад монгол захирал үүнийг нь хүлээн зөвшөөрч. Засаг дарга ч зөөлөрч анхны хүссэн 4.3 га газрыг нь бүр 10 болгон нэмэгдүүлж газрын зөвшөөрөл өгчээ. Ингээд орон сууцны хотхон баригдах үед гурван түншийн дунд хагарал гарчээ. /үргэлжлэл бий/

NUUTS.mn