Л.Энх-Амгалан эхлээд нуураа цэвэрлэх хэрэгтэй
УИХ-ын гишүүн Л.Энх-Амгалан Хөвсгөл нуурыг дэлхийн байгалийн өвд бүртгүүлэхээр ЮНЕСКО-д бүх бичиг баримтаа өгсөн, энэ санаачилгад нь хөвсгөлчүүд хийгээд далай ээжийг хамгаалах зорилготой ТББ-ууд ихэд баярласан тухай сэтгэл хөдлөн ярьжээ. Саяхан хөдөлмөрийн гавъяаны улаан тугийн одонгоор шагнуулах үедээ ингэж сэтгэл хөдлөн ярьж байсан. Гэтэл Хөвсгөл далайг цэвэрлэх гэдэг том ажил огт хийгдээгүй байдаг. Эрхэм гишүүн нэр дэвшиж байхдаа сонгуулийн үеэр энэ талаар нэлээд ярьж далайд живсэн машин төмрийн сэг хаягдлыг гаргаж хаях талаар ажил зохион байгуулна гэж байсан. Харамсалтай нь одоогоор татаад гаргачихсан нэг ч төмрийн хаягдал алга байна. Засаг хөдөлмөрийн гавъяаны улаан тугийн одонгоор шагнахдаа Хөвсгөл нуурыг цэвэрлэх тухай ярьсан гэж өгсөн үү эсвэл ирээдүйд цэвэрлэчихээр хүн байна гэж өгсөн үү гэдэг нь тодорхойгүй. Ёроолдоо бөөн төмрийн хогтой нуурыг дэлхийн байгалийн өвд бүртгэх эсэх нь эргэлзээтэй. Далайд унасан машинуудын дунд дүүрэн шатахуунтай цистерн хүртэл бий гэсэн яриа явдаг. Хэрвээ бүртгэхдээ хүрвэл Л.Энх-Амгалан гишүүний бичгийг үндэслээд бүртгэхгүй биз. ЮНЕСКО-гоос хүмүүс ирж шалгавал эрхэм гишүүн ёроолд нь дан загас байгаа гэж хэлэх болов уу…
NUUTS.mn
