Засгийн газар “Авто импекс” компаний барилгыг “дээрэмдэхээр” шийджээ
.jpg)
Олон нийтэд ямар нэгэн аргаар таалагдах гэсэн Ч.Сайханбилэг оны өмнөхөн эмнэлгийн зориулалтаар ашиглаж болох барилга байгууламжийг судлах олох ажлын хэсэг байгуулсан. Ажлын хэсэг нь “нойр хоолгүй” шахам ажиллаад “Авто импекс” ХК-ийн байр, Зам, тээврийн яам, Соёл, спорт, аялал жуулчлалын яам /хуучин нэрээр/, “Монсам” ХХК, Газрын тосны газрын барилга зэрэг байгууламжуудыг эхний ээлжинд Ерөнхий сайдад танилцуулсан гэнэ. Эдгээр барилгад Мэргэжлийн хяналтын ерөнхий газар, Онцгой байдлын ерөнхий газраас хийсэн хяналт шалгалтын дүгнэлтийг үндэслэн харьцуулалт хийхэд “Авто импекс” ХК-ийн барилгыг эмнэлгийн зориулалтаар өөрчлөх, засч тохижуулахад хамгийн тохиромжтой гэж үзжээ. Харин бусад барилга нь “Эрүүл мэндийн байгууллагын орчны эрүүл ахуйн шаардлага”, “Газар хөдлөлтийн бүс нутагт барилга төлөвлөх барилгын норм ба дүрэм”, “Барилга байгууламж, инженерийн шугам сүлжээний засвар, ашиглалтын хугацааны жишиг норм”, өрөөний гэрэлтүүлгийн төлөвлөлтийн шаардлага хангаагүй, барилгад эвдрэл, ан цав үүссэн болон бусад үндэслэлээр хүүхдийн эмнэлгийн зориулалтаар ашиглахад тохиромжгүй болж таарчээ. Гэхдээ хамгийн боломжит хувилбараар сонгогдоод “Авто импекс” компанийн хувьцааны 49 хувийг нэр бүхий иргэд эзэмшиж байгаа тул дээрх барилгад эмнэлэг байгуулах асуудал ихээхэн төвөгтэй, удаашрах шинжтэй байж магадгүй хэмээн Ерөнхий сайдад “зовлон” тоцсон сурагтай. Ийнхүү төрийн байгууллагын өндөр өндөр харшаа “хайрласан гамнасан” Засгийн газар хувийн хэвшлийн барилга руу нүд унагаад эхэлжээ.
NUUTS.mn
