Согтуу залуус хэсгийн төлөөлөгчийг бугуйлаар оосорлоод чирнэ хэмээн дайрчээ
Нийтэлсэн: 2015-01-19 02:23:52
Увс аймгийн Завхан сумын гурван залуу болох Л.Сумьяа, Б.Бат-Очир, С.Давааням нар нь бүлэглэн сумын хэсгийн төлөөлөгч, цагдаагийн дэслэгчийг албан үүргээ гүйцэтгэж байхад нь эсэргүүцсэн гэмт хэрэгтээ 4-5 сар баривчлах ялаар шийтгүүлжээ. “Төгийн нуур” дэлгүүр лүү морьтойгоо орох гэж дайрсан согтуу Даваанямыг хэсэг рүүгээ дагуулаад явж байтал араас нь морьтой хүн ирэн шилэн хүзүү рүү нь ташуурдсан нь Бат-Очир байжээ. Энэ үед Сумъяа нь мотоцикльтой урдаас нь гарч ирэн зам хаагаад согтуу залуус төрийн төлөөлөгчийг дундаа оруулаад авч. Улмаар Давааням, Бат-Очир нар нь сумын холбооны газрын үүднээс цагдаагийн кабон хүртэл ташуурдан хөөсөн гэнэ. Дэслэгч залууд тухайн үед гаваас өөр нэг бүрийн хамгаалах хэрэгсэл байсангүй тул арга буюу хүчин мөхөсдөж. Нүүр лүүгээ хэд хэдэн удаа цохиулж бас мөрдөсөө хуу татуулсан гэнэ. Гэсэн ч яаж ийгээд Бат-Очирыг нь гавлаж чадаж. Нөгөө хоёрын нэг нь бугуйлаа барьчихсан нөгөө нь дөрөөгөө тайлаад цулбуурандаа хийчихсэн эргүүлж “гараад ир чамайг ална, манай суманд ирсэн хэсгийн төлөөлөгчийг бугуйлаар оосорлоод чирж номхруулдаг юм” хэмээн кабоныг нь тойрон давхиж заналхийлж байсан нь тогтоогджээ.
NUUTS.mn
