18 настай залуу цагдаа болж жүжиглэн бусдын машин хураагаад Дархан орчихоод иржээ
Нийтэлсэн: 2015-01-16 06:03:39
Дарханы 18 настай Ц.Э гэдэг залуу цагдаа болж жүжиглэн нэгэн иргэний машиныг хураагаад тэр унаагаараа төрсөн хот руугаа давхичихсан хэрэг гарчээ. Сэргэлэн залуу Орчлон хорооллын ил зогсоол дээр байсан М.З-гийн эзэмшлийн “Тоёото приус” машиныг гарц хаалаа хэмээн “шалгахаар” очжээ. Цонхыг нь тогштол дотор нь хоёр хүн байж. “Цагдаагийн ажилтан байна” бичиг баримтаа үзүүл гээд тээврийн хэрэгслийн гэрчилгээг нь хураан авч. “Чи согтуу байна уу” гээд гэрчилгээг нь хуйлаад жолоочоор нь үлээлгэж тоглож. Энэ завсардаа цонхоор нь гараа оруулаад түлхүүрийг нь авсан гэнэ. Бичиг баримт түлхүүрийг би цагдаагийн ажилтан байна хэмээн хурааж аваад жолоочийг хамт байсан эмэгтэйтэй нь шалгана гээд хажууханд нь байсан Сонгинохайрхан дүүргийн Цагдаагийн 1-р хэлтэс рүү дагуулаад явжээ. Үүдэнд нэг цагдаатай таарсанд “дэслэгч Билгүүн байна уу” хэмээн асууж нөгөө хоёртоо үнэмшил төрүүлсэн гэнэ. Жолоочийг эмэгтэйтэй нь хамт хэлтсийн үүдэнд үлдээгээд “эрүүлжүүлэх ороод ирье” гээд булан тойроод шууд нөгөө машин дээрээ очин асаагаад хөдөлж. Хөдлөөд дэлгүүрийн хажууд жолоочтой нь халз таарахад тэрээр гараа алдлан зам хаасан гэнэ. Гэтэл “цагдаа” залуу зогсоогүй тул амиа хамгаалан замаас холджээ. Хүний машин авсан залуу шууд 22-ын товчоо руу давхиж тэндээсээ 20 мянган төгрөгөнд шатахуун хийгээд төрсөн хотын зүг давхижээ. Дарханд очоод найз нартайгаа уулзан машинаар зугаалж баахан явсан гэнэ. Мөн угаалгын газар оруулж цэмцийтэл нь угаалгасан аж. Машинаа алдсан иргэн тэр доороо цагдаад хандаж. Дарханы цагдаа нар Ц.Э-г хоёр хоногийн дараа олж баривчилжээ. Шүүх цагдаа болж жүжиглэсэн залууг бусдын машиныг ашиглан шамшигдуулах зорилгогүйгээр авч зугтаасан гэж үзсэн ч хөнгөн гэмт хэрэг тул хэргийг нь хэргэсэхгүй болгож эрүүгийн хариуцлагаас чөлөөлжээ.
NUUTS.mn
