Л.Пүрэвсүрэн сайд ГХЯ-наас 30 хүн халжээ
ГХ-ны сайд Л.Пүрэвсүрэн тодорхой чиг үүрэггүй албан тушаалыг цомхотгох болон албан үүргийн давхардалыг арилгах зорилгоор нийтдээ 30 гаруй ажилтанг халсан нь шуугиан дэгдээгээд байна. ГХЯ-нд зохиомол орон тоог бий болгох явдал хэрээс хэтэрсэн нь Бодлого төлөвлөлт, судалгааны газарын хажууд яг зэрэгцүүлэн Гадаад бодлогийн нэгдсэн зохицуулалтын судалгааны төв гэж байгуулсанаас харагддаг. Нэрнээсээ л эхлээд нэг үүрэгтэй нь гэдэг тодорхой энэ хоёр том газар тус бүрд нь 10-13 хүний орон тоотойгоор ажиллаж байна. Ер нь сүүлийн хоёр жилд энэ яаманд зохиомол орон тоо бий болгох явдал хавтгайрсан. Яамын дэргэдэх ДБҮААГ-д л гэхэд 2-3 дэд даргатай агаад хоорондоо өрсөлдөөд сууж байдаг. Энэ яаманд нөлөөтэй УИХ-ын гишүүн, АН-ын хоёр эрхэм нэг нэг дэд дарга оруулсан гэдэг. Мөн энэ газарт сургалтын менежер, чанарын менежер, өмчийн менежер гээд үл ойлгогдох албан тушаал олноороо бий болсон. Сургалтын үйл ажиллагаа явуулдаггүй атал сургалт хариуцсан менежертэй байх шижээтэй. Өмнөх сайд Л.Болдын Л.Пүрэвсүрэнд аминлан захиад авч яваарай гээд байсан Дипломат академи гэж том газар бий. Мөн л гадаад харилцааны мэргэжилтэн бэлддэг бусад сургалтын байгууллагатай давхардсан үйл ажиллагаатай агаад тусдаа олон хүнтэй, байр офистой болсон нь жилдээ нэг тэрбум илүү төгрөгийн цалин, үйл ажиллагаа, халаалтын зардал ГХЯ-наас төлөгддөг тухай ажилтнууд нь ярьж байна. Л.Пүрэвсүрэн сайдын дотоод халаа сэлгээ нь гадаадад байгаа ЭСЯ, дипломат байгууллагад ч бас хүрч байж сая үр дүнгээ өгөх гэнэ. Учир нь тэнд өмнөх сайд, дэд сайд нарын гэх хүмүүс дэндүү олноороо байдаг сурагтай. Л.Болд сайдын туслах явсан Мөнхжаргал гэдэг залуу АНУ-д консулаар томилогдсоны дараа аав нь болох хүн аж ахуйн даргаар очиж байсан тухай ГХЯ-ныхан одоо болтол ярьж байна. Ийнхүү гадаад харилцааны мэргэжлийн ажилтнууд нь гадуурхагдсан энэ байдлыг шинэ сайд нь засаж залруулж эхэлжээ.
NUUTS.mn
