“Арева Монгол” компани жирэмсэн эмэгтэйг ажлаас халжээ
Нийтэлсэн: 2015-01-08 02:52:44
Дорноговь, Сүхбаатар аймагт ураны хайгуул хийдэг “Арева Монгол” нь Францын төрийн өмчит “Арева” гурппын охин компани юм. Энэ компани байгаль орчинд ээлтэй технологи нэвтрүүлж , нийгмийн хариуцлагаа хэрэгжүүлэгч сайн засаглалтай гэж өөрсдийгөө сурталчилдаг. Гэтэл үнэн хэрэгтээ компаний засаглалын ёс зүйгүйн дээр Монгол улсын хөдөлмөрийн хууль тогтоомжийг зөрчиж байдаг нь жирэмсэн эмэгтэйг ажлаас халсан явдал нь баталжээ. Тус компаний олон нийттэй харилцах албаны ажилтан эмэгтэй Н.Б нь өнгөрсөн онд бие давхар болжээ. Жирэмсэн болсон гэдгээ мэдэгдсэнээс хойш компаний удирдлагаас хандах хандлага эрс өөрчлөгдөж ажлаар дарах, ачааллыг нь нэмэгдүүлэхээс гадна халах өө сэв хайгаад эхэлсэн гэж хохирогч эмэгтэй баталжээ. Эцэст нь тодорхой шалтаг гарахгүй болохоор нь ажлын гүйцэтгэл муу, ажлын цаг баримтлаагүй гэсэн үндэслэлгүй ерөнхий шалтгаанаар гүйцэтгэх захирал нь тушаал гарган халсан гэнэ. Ажлаасаа үндэслэлгүй халагдсан эмэгтэй хууль дүрмийн дагуу шүүхэд хандахад Монголын бус гадаадын хуулийг дагадаг энэ компаний удирдлага арга буюу бууж өгчээ. Ажилгүй байсан үеийн цалин болон буцалтгүй тусламж өгөхөөр амлаж “барьцаалсан” дипломны ажлын эх хувийг нь хүртэл эргүүлж өгөхөөр болсон гэнэ. Хөдөлмөрийн хуулиар жирэмсэн эмэгтэйг ажлаас халах, орон тооны цомхотголд оруулахыг хатуу хориглодогоос гадна эргээд ажилдаа орох хүртэл нь ажлын байрыг нь хадгалах үүргийг ажил олгогчидод даалгасан байдаг. Харин эн бүх хуулийн заалт “Арева Монгол”-д хамаагүй бололтой.
NUUTS.mn
