Д.Эрдэнэбатад юм хийж чадахгүй гээд бага мөнгө өгчээ
Дан ганц уул уурхайгаас хараат Монголын эдийн засгийн хөдөлгүүр нь аж үйлдвэржилт гэдэг том уриаг олон жил хашгирсан. Засгийн газар солигдох бүрийд аж үйлдвэржүүлнэ хэмээн амладаг. УИХ-ын гишүүд үйлдвэрлэгч орон болж байж хөгжинө гэх мэтээр чуулганы танхимд уралдан мэдэмхийрсэнийг тоолохын аргагүй. “Шийдлийн” Засгийн газар шийдсэн мэхээ хийж урьд нь салбарын яамдад хавсарга мэтээр хавчуулагдаж явсан “аж үйлдвэрийг” тусгай яам байгуулж байж хариуцуулсан. Сайдаар нь УИХ дахь АН-ын бүлгийн дарга асан Д.Эрдэнэбатыг томилж байр сав гарган, дэд сайд томилж өгөөд “тамгатай бол тамгатай сайдтай бол сайдтай” жинхэнэ яам болголоо. Даан ч төсөв мөнгө өгөхөө мартжээ 2015 оны төсвийг батлахад Засгийн газрын бүтэц болон төсвийн задаргаан дээр “аж үйлдвэрийн яам” гэж байгаагүй ч монголчууд түүхэндээ анх удаа төсөвгүй яамыг нүдээ аниад баталсан. “Мөнгөтэй хүн хөгжим захиалдаг” гэгчээр төсөвгүй байж Д.Эрдэнэбат нь дэд сайдаа дагуулан ирээд “аж үйлдвэржүүлнэ” хэмээн сүртэй мэдэгдэл хийснийг яана. Засгийн газар Аж үйлдвэрийн яаманд төсөв өгөөгүйгээ төсвийн тодотголоор “залруулсан” ч сайдыг нь даапаалж байгаа мэт ердөө 18.1-хэн тэрбум төгрөг тавьсан байх юм. Гэтэл Сайншанд, Дарханы арьс ширний аж үйлдвэрийн цогцолборын ТЭЗҮ боловсруулахад л 600-800 сая төгрөг зарцуулсан тооцоо бий. Арваадхан том төслийн ТЭЗҮ хийгээд л дуусах мөнгөөр яаж “аж үйлдвэржүүлэх” гэж байгаа нь сонин. Эсвэл сайдыг нь юм хийх чадваргүй гээд бага мөнгө тавьсан юм болов уу ???
NUUTS.mn
