Нууц мэдээллийн уурхай

Хангамжийн менежер Б.Алтанцаг нь 20 сая төгрөг байхад гаалийн бүрдүүлэлт хийгдээд хураагдахаас нь өмнө ган хавтангаа авчихна гэж захиралдаа “ойлгуулжээ”.  А.Шоовдор хувийн бус үйлдвэр, хамт олныхоо эрх ашгийг урдаа тавиад ерөнхий нягтлангаа дуудан Алтанцагт “дараа тайлангаар” хэмээн 20 сая төгрөг өгөх үүрэг өгчээ. Үйлдвэрийнхээ төлөө л зарцуул гэснээс  хээл хахуульд өг гэж хэлээгүй гэнэ. Хангамжийн менежер Б.Алтанцаг манай үйлдвэр гаалийнхны шаардсан баримтыг гаргаж өгч чадахгүй  байсан гэдгийг хүлээн зөвшөөрчээ. Шаардлагатай бичиг баримтыг яагаад ч бүрдүүлж өгч чадахгүй тул “өөр боломж байна уу” гэж асуухад хариуцсан байцаагч Даваадорж нь 20 сая төгрөг байвал болно гэсэн гэнэ. Мөнгөний тоог захирал А.Шоовдордоо дуулгахад листээ хурдан авч дулаан солилцуулагч хийн зуухаа галлах хэрэгтэй гээд хурдан гаргаж өгөхийг санхүүдээ үүрэгджээ. Гаалийн ахлах байцаагч  Наранхүү ган хавтангаа авахаар “Хөтөлийн цемент шохой”-гоос ирүүлсэн баримт зөрүүтэй, дутуу тул бүрдүүлэлт хийгдэхгүй, ган хавтан нь түр хадгалах агуулах руу шилжих болсоныг сайн мэдэж байж. Энэ үед уг асуудлыг хариуцсан байцаагч Даваадорж түүнд “Хөтөлийн цемент шохой” үйлдвэрийнхэн байгаа баримтаар бүрдүүлэлт хийж өгөөч, дараа шагная гэж байна хэмээн “шивнэсэн” гэнэ.  Харин сэргэлэн менежер Б.Алтанцаг нь өнөөх 20 сая төгрөгөөсөө “ердөө байгаа нь л энэ, боломжоороо л өглөө” гээд тавыг нь л гаалийн байцаагч нарт өгчээ.  Алтанцаг нь “шагналын” таван сая төгрөгөө  Даваадоржийн хамаатан Баярсайханы данс рүү шилжүүлжээ. Энэ нь хувийнхаа дансаар авбал дараа нь хэл ам гарвал балрана гээд өөр хүний данс өгсөн Даваадоржийн мэргэн ухаан байж. Гэхдээ тэрээр  мөрдөн байцаалтанд хахуулийн мөнгө аваагүй харин эмчилгээ хийгэх гээд мөнгөний хэрэг гарсан тул Алтанцагаас таван сая төгрөг зээлсэн гэжээ.  “Эмчилгээ хийлгэх” гэж зээлсэн мөнгөнөөсөө ахлах Наранхүү 1.3 саяыг өгөөд өөрөө 2.4 саяыг авсан гэнэ. Харин нөгөө хоёр байцаагч нь ч хахуулийн мөнгөө авсанаа үгүйсгэдэг. Даваадорж нь ахлах Наранхүүгийн өрөөнд нь ороод “Хөтөлийн цемент шохой” үйлдвэрийнхэн баярлалаа гэж байна гээд 1.3 сая төгрөг өгсөн гэдэг бол  ахлах  нь шал өөр мэдүүлэг өгчээ. Тэрээр Дарханы “IT ZONE” дэлгүүрээс нотебуук зээлээр авах гэхэд Дарханых биш гээд өгөхгүй байж. Энэ зовлонгоо удирдлагандаа ажилладаг Даваадоржид санаандгүй ярьтал тэрээр хувиасаа 1.3 сая төгрөг гаргаад авч өгсөн гэнэ.  Тэрээр хамт ажилладаг Даваадоржоос мөнгө зээлсэн агаад гэхдээ 1.3 биш ердөө ганц саяыг л авсан гэнэ.  Ийнхүү гаалийн байцаагчид “араа даана, дараа нь шагнана” гэсэн “Хөтөлийн цемент шохой” үйлдвэрийхний гоё үгэнд “итгээд” гаалийн бүрдүүлэлт хийж өгсөн биш тус бүрдээ 1.0-1.6 жилийн хорих ял авчээ.

 

NUUTS.mn