82 саяын өрөө төлөхийн тулд 269 сая төгрөгийн алт гаргах гэж байгаад баригджээ
Нийтэлсэн: 2015-01-03 03:43:33
Дорноговь аймгийн харьяат гурван хүүхэдтэй өрх толгойсон эмэгтэй хашаа байшин зээлээр авсан нь 82 сая төгрөг болжээ. Энэ өрөө дарахын тулд алт хилээр гаргаж Эрээнд зарах гэж байсан хэмээн Б.Отгонцэцэг мэдүүлжээ. Түүнд Хятадын Нингся мужийн их сургуульд сурч байсан оюутан А.Мөнх-Алтай тусалсан гэнэ. Тэд нийт 3.9 кг буюу 269.3 сая төгрөгийн алтыг хар өнгийн будагч бодисоор будаад нурууны бүсэнд/бөөрний даруулга ч гэдэг/ хийн биедээ нууж хил нэвтрэх гэсэн ч баригдсан. Алт гаргах гэсэн хоёр Замын-Үүдийн жорлонд алтаа будаж хар болгож. Нуруувчний тугалгыг нь аваад алтаа хийсэн боловч багтсангүйд ахин нэгийг авч хийгээд хоюулаа бүсэлсэн гэнэ. Б.Отгонцэцэгт алт цулуулахад Амартүвшин гэгч зуучилжээ. Тэрээр ах дүүсээрээ нийлэн Урт цагааны 3-р корпусын хоёр давхарт алтны наймаа хийдэг Н.Б-аас гурван кг алт асуухад дор нь цуглуулж өгчээ. Өөрт байсан 1.8 кг дээрээ нэмэн тэр хавийн хүмүүсээс цуглуулсаар 3.9 болгосон аж. Тэд нэг гм-ыг нь 67 мянган төгрөгөөр тохирсон нь нийтдээ 236 сая төгрөг болсон агаад Н.Б-д 37 сая төгрөг дутуу төлсөн гэнэ. Мөн алтаа төмөр хэвэнд есөн нарийн хэсэг, нэг дөрвөлжин хэлбэрт оруулж цутгуулж авчээ. Ингэж бэлдсэн алтаа нуруувч бүсэнд хийгээд Замын-Үүдийн шалган нэвтрүүлэх цэгийг давсан ч хилээс гараад дундын бүсэнд нь явахад нь тагнуулынхан саатуулж баривчилжээ.
NUUTS.mn
