2014 оны хамгийн догшин төрийн албан хаагч эмэгтэй
Нийтэлсэн: 2014-12-31 03:03:17
Энэ оны хамгийн зодоонч догшин төрийн албан хаагч эмэгтэй Сонгино хайрхан дүүргээс тодорчээ. Тус дүүргийн ЗДТГ-ын түшмэл Б.Сэлэнгэ нь дарааллын урдуур орох гэсний улмаас нэгэн эмэгтэйтэй маргалдаж улмаар “вакус”-ы шилээр тархийг нь хага цохижээ. Хохирогч мөрдөн байцаалтанд “1-р хорооллын Номин худалдааны төвд хүнсээ цуглуулаад явж байсан, хүүхдээ суулгасан тэргэнцэрээ кассын дэргэд орхиод мартсан юмаа аваад иртэл нэг эмэгтэй хүүхдийг маань тэргэнцэртэй нь хойшоо түлхчихээд өөрөө урд нь гараад зогсчихсон байсан, би наана чинь байсан юм аа гэхэд тэгээд яадаг юм гэсэн, бид маргалдахад миний толгой руу вакусны шилээр цохисон, толгой хагарч оёдол тавиулсан” гэжээ. Түшмэл хатагтай бөгжтэй гараараа цохисон гэж мэлзсэн ч гэрч нар ундааны шилээр цохисоныг нь баталжээ. Байдал бишдэнгүүт хохирогчид 1.2 сая төгрөг өгч эвлэрсэн ч шүүх түүнийг бусдын бие махбодод хөнгөн гэмтэл санаатай учруулсан хэрэгт буруутай гэж үзжээ. Энэ байдлаас харахад манай төрийн албаныхан маш дээрэнгүй ааш араншинтай болсон гэдэг нь харагдаж байна. Төрийн албанд орохдоо өргөдөг нялуун үгтэй тангарагаа гараад л мартдаг ажээ.
