2014 оны хамгийн хэрцгий хулгайн анчид
Нийтэлсэн: 2014-12-31 02:33:48
Энэ онд “уламжлал” ёсоор олон хулгайн ангийн гэмт хэрэг гарсан. Гэсэн ч үйлдсэн арга хэлбэр ашиг олох гэсэн зорилгоороо Говь-Сүмбэр аймгийн Сүмбэр сумын З.Сэндэнням, Б.Цолмонсүрэн нарын халиун буга агнасан хэрэг нь дэндүү хэрцгий аж. Энэ аймгийн нутагт сүүлийн үед Хэнтий болон Төв аймгаас буга орж ирэх болсон гэж аймгийн БОА-ны мэргэжилтэн Ц.Уранбаяр баталж. Том биетэй энэ амьтныг тэгш талд 2-3 км хөөхөд л бахардаж унадаг гэнэ. Тэгвэл З.Сэндэнням нь Сүмбэр сумын 6-р багийн нутаг Дулааны уул гэдэг газраас эр халиун бугыг мотоциклоор хөөж багтраагаад гэрийн чигтээ авчиржээ. Гэрч нарын баталсанаар эцэж ядран хөлөрсөн буга жалганд гуйвж найган зогсож байсан аж. З.Сэндэнням нь Б.Цолмонсүрэнтэй хамтран бугийг нядлаж махыг нь ашиглаад арван салаа эврийг нь авсан нь тогтоогдож. Мөрдөн байцаалтанд хүүхдүүддээ үзүүлэх гэж тууж авчирсан, зургийг нь авах гэж хөөж ирсэн гэж мэдүүлсэн төдийгүй халиун бугыг ховор ан гэдгийг огт мэдээгүй гэж мэлзжээ. Хөдөөнийхөн хотоор дүүрэн малтай атлаа буга, зээрийн мах руу хошуурдагийг хэрцгий явдал гэхээс өөрөөр тайлбарлах аргагүй.
NUUTS.mn
