МҮОНРТ-ийн уран бүтээлчид 641.0-1.4 сая төгрөгийн цалинтай
Нийтэлсэн: 2014-12-29 03:27:40
Төрийн өмчит энэ том айлд МҮОНРТ-ийн Үндэсний зөвлөлийн хүсэлтээр өнгөрсөн жил нэг удаа аудитын шалгалт хийсэн. Энэ шалгалтаар ноцтой олон зөрчил илэрсэн. МҮОНРТ нь 708 хүний орон тоотой 5.5 тэрбумын цалингийн сангийн гүйцэтгэлтэй гарчээ. Цалингийн дундаж нь 641.0-1.4 сая төгрөг байдаг гэнэ. Цалингийн зардлыг хамгийн ихээр хэтрүүлдэг нэгж нь Тамгын газар, МҮОНТ бөгөөд нийтдээ 39.2-99.6 сая төгрөгөөр хэтрүүлсэн байсан нь тогтоогдож. Мөн МҮОНРТ-тэй гэрээгээр ажиллаж байсан хувийн студи нь тамга тэмдгээ хураалгаагүй, тус телевизийн нэрийн өмнөөс гэрээ хийж төлбөрийг авсан тохиолдлыг аудитын шалгалт илрүүлжээ. УБЕГ-аас авсан лавлагаагаар “Эв эе” студи Б.Жаргал, “Сэмүүн” нь Наранцэцэг, “Гэрэлтэй цонх” нь Ч.Лхагвадаш, “Чандмань” нь Ө.Нарангэрэл, “Титэм” нь Пунсаа нарын нэр дээр бүртгэлтэй байсан гэнэ. “Монголын үндэсний телевиз Үдшийн хэмнэл студи” гэсэн тамга хураагдаагүй, ЦЭГ-тай 2012 онд 17.8 саяын гэрээ байгуулж есөн саяыг, 2013 онд 27 саяын гэрээ байгуулснаас 13.5 нь саяыг нь тус студийн дансаар оруулж авсан байж. 2012 онд явагдсан “Уриншаас ургац” улсын уралдааны гэрээг мөн л “Үдшийн хэмнэл” студийн нэрээр хийж “Агромаштех” компаниас өгсөн санхүүжилтийг уран бүтээлчдийн хувийн харилцах дансаар авсан нь 2013 оны МҮОНРТ-ийн дотоод хяналтаар илэрсэн удаатай. Студи болгоны гэрээний маягтын толгой дээр “Монголын үндэсний олон нийтийн телевиз” гэсэн тодотгол байдаг нь байгууллага аж ахуйн нэгжийг МҮОНРТ-тэй гэрээ хийсэн гэсэн төөрөгдөлд оруулдаг байж болзошгүй гэж аудитын дүгнэлтэд дурджээ.
NUUTS.mn
