“Шангрилла”-гийн сингапур менежер зочид буудлын удирдлагатайгаа заргалдаж байна
Нийтэлсэн: 2014-12-26 04:06:16
Манай томоохон зочид буудлын нэг “Шангрилла”-д гадаад ажилтнууд холбогдсон том булхай дэгдэж зарим нь халагдаж Монгол улсаас гурав хоногийн дотор гар хэмээн удирдлага нь хөөж туужээ. Сингапур улсын иргэн Чоу Сеу Ин нь 2010 оноос эхлэн барилгын төслийн менежерээр ажиллаж байгаад жилийн өмнө халагдсан ч зочид буудлын захиргаанаас зургаан сарын цалин болох 72 мянган доллар буюу 128 сая төгрөг нэхэмжилэн арваад сар зарга хийж яваа гэнэ. Тэрээр өөрийгөө хууль тогтоомж болон компанитай байгуулсан хөдөлмөрийн гэрээгээ мөрдөн сахиж ямар нэгэн алдаа дутагдал гаргаагүй хэмээн тайлбарладаг. Тийн атал зочид буудлын захиргаа ажлаас халсан шалтгаанаа ч хэлэлгүй гэрээ цуцлаад шуудхан Монголоос гурав хоногийн дотор гар гэж хөөсөн гэнэ. Харин захиргаа нь гадаад ажилтнуудын том бульхайг илчилсэн аж. Төслийн менежер Чоу Сеу Ин нь компаний гурван удирдах ажилтантай хамтран ажил гүйцэтгэгч компаниудын зардлаар хэд хэдэн удаа аялалд явсан, мөн аялах үеийн зочид буудал, үзвэр караоке зэрэг үйлчилгээний мөнгөө даалгадаг гэсэн мэдээлэл иржээ. Аялалын зардлыг даасан компаниуд нь өөрсдөө өргөдөл гаргаж “матсан” тул үнэн болж таарчээ. Дотоод шалгалтаар Чоу Сеу Интэй хамт менежер Чан Хаю Пинг болон Ип Тюнг Лой нар гүйцэтгэгч компаниудаар даалган тансаглаж байсан нь илэрч. Нөгөө хоёр нь буруугаа мэдээд тэр дороо Монголоос явсан бол зөрүүд Чоу Сеу Ин одоо болтол “Шангрилла” зочид буудлын удирдлагуудтай заргалдаж байгаа гэнэ.
NUUTS.mn
