“Бэрх зараа” компани 22-ын товчооны замын ажлын буруутнаар ерөнхий инженерээ тодруулж байрыг нь буцаан авчээ
Нийтэлсэн: 2014-12-25 05:13:05
УИХ-ын гишүүн асан Ц.Батбаярын дүү Ц.Бат-Эрдэнийн “Бэрх зараа” компани 22-ын товчоо чиглэлийн 10.6 км замын ажлыг аваад гуравдахь жилдээ дуусгалгүй төр засаг олон нийтээр тоглож байгаа. Тэгвэл эрхэм захирал замын ажлын бүтэлгүйдлийн буруутнаар ерөнхий инженерээ тодруулж ажлаас нь халаад өгсөн байраа буцаан авчээ. Ерөнхий инженер Б.Э нь тухайн замын ажлыг гүйцэтгэх бригадыг ахалж байсны хувьд ажлын байранд гарсан түлш түүхий эдийн хулгай, ажлын хийдэл, ажилчид дэмий сэлгүүцэх зэрэг зөрчил доголдлыг арилгах талаар ямар ч арга хэмжээ аваагүйн улмаас “Бэрх зараа” компани нь маш их хэмжээний хохирол хүлээж санхүүний хүнд байдалд орсон гэж Ц.Бат-Эрдэнэ захирал дүгнэжээ. Замын өргөтгөлийн ажил жил дараалан сунжирснаас ажил хэргийн хүрээнд компаний бизнесийн нэр хүнд ч их хохирсон гэнэ. Ингээд арга буюу ерөнхий инженерээ халж өгсөн байрнаасаа гарах шаардлага хүргүүлжээ. Харин ерөнхий инженер нь 2009 оны шинэ жилийн арга хэмжээн дээр намайг байгууллагын тэргүүний ажилтан “Шилдэг инженер”-ээр шалгаруулж нэг өрөө байраар шагнах батламж өгсөн гэж маргаж. Гэсэн ч шагналын байраа өгөлгүй хоёр жил болсоны дараа 2011 оны 12-р сарын 25-нд болсон компаний шинэ жилийн арга хэмжээн дээр Ц.Бат-Эрдэнэ захирал өөрийн биеэр “өмнө амласан нэг өрөө байраа өгч чадалгүй удаасан, энэ хугацаанд үр бүтээлтэй ажилласан тул шагналын байраа хоёр өрөө болгон томруулж өгч байна” хамт олны дунд зарлан “Саруул дэнж” хотхоны хоёр өрөө байрны түлхүүр өгсөн. Гэтэл уг байр нь цаанаа өөр хүний эзэмшилд байсан бөгөөд захирал гуай түүнтэй тохирон сайн ажилласан ажилтнаа түр суулгаж байсан болж таарчээ. Ингээд замын ажлыг муу удирдсан, ажлын шаардлага тавихаар байрны ордер шилжүүлж өг хэмээн хариу хэл ам гаргадаг гээд Ц.Бат-Эрдэнэ захирал ерөнхий инженерээ халж байраа буцаан авахаар болжээ. “Бэрх зараа” компаний 12 тэрбумын өртөгтэй 22-ын товчооны замын өргөтгөлийн дуусдаггүй ажил ердөө ганц хүнээс “шалтгаалж” олон жил дамжин удааширч байсан бололтой.
NUUTS.mn
