Баянгол дүүргийн камержуулах тендерийг “Лийд линк” компани хулхиджээ
Нийтэлсэн: 2014-12-25 04:32:47
Тус дүүргийн “Нийтийн эзэмшлийн болон орон сууцны гадна талбайг камержуулах” тендерт дүүргийн Засаг дарга Д.Оросоогийн захирамжаар байгуулагдсан Үнэлгээний хороо “Лийд линк” гэдэг компанийг шалгаруулсан. Уг компанитай түлхүүр гардуулах нөхцлөөр ажил гүйцэтгэх гэрээ байгуулж 670 сая төгрөгийн санхүүжилтийг нь бүрэн олгожээ. Гэсэн ч хамгийн сайн хэмээн шалгаруулсан компани нь хамгийн муу хяналтын камер тавьсан нь шалгалтаар илэрчээ. “Лийд линк”-ийн хийж гүйцэтгэсэн гэх ажилд ашиглалтын явцад олон гэмтэл илэрч. Тог баригчийг байрлуулахдаа холбогдох тоног төхөөрөмж цахилгааны эх үүсвэртэй холбоогүй байж. Тендерийн үзүүлэлт ёсоор гадна зориулалтын “AXIS” маркийн “PIXEL counter” функц нь 150-200 метрт бичлэг хийх, бичлэгт гарсан хүний нүүр царай, тээврийн хэрэгслийн улмын дугаарыг танигдах хэмжээнд хүртэл томруулан харах чадвартай байх ёстой атал “Лийд линк”-ийн байрлуулсан хяналтын камер нь 10-15 метрийн зайд байрлах автомашиныг дугаарыг ч харуулж чадахгүй байжээ. Ийнхүү төсвийн 670 сая төгрөгийн тендерийн ажил хариуцлагагүй компаний гараар орж үр ашиггүй зарцуулагджээ. Мөн дүүргийн удирдлага нь ажлын гүйцэтгэл ямар байгааг хянах үүргээ ч хэрэгжүүлсэнгүй зөнд нь хаясан байна.
NUUTS.mn
