Говь-Сүмбэр аймгийн МХГ-ынхан хятад хэл сурах уу Д.Батмөнх дарга аа ?
Монголын төрийн албан хаагчид хятад хэл сурахаас өөр аргагүй байдал Говь-Сүмбэр аймгийн Мэргэжлийн хяналтын газарт тохиожээ. Энэ газрынхан Орон нутаг хөгжүүлэх сангийн хөрөнгө оруулалтаар 11.5 сая төгрөгийн өртөг бүхий хүнсний аюулгүй байдлын шинжилгээ хийдэг тоног төхөөрөмж авсан нь шинжилгээний дүгнэлт нь хятад хэлээр гардаг эд байжээ. Хүнсний бүтээгдэхүүний дээжийн шинжилгээг олон үзүүлэлтээр нарийвчлалтай хийдэг. Гэтэл шинжилгээний хариу нь хятад хэлээр гардаг тул тайлаад уншчих хүн мэдээж байсангүй. Өдгөө энэ өндөр үнэтэй тоног төхөөрөмжөө яахаа мэдэхээ болиод байна. Буцахаар гэхээр дээр суугаа нэгэн том даргын “шахаа” тул ийм шийдвэр гаргах зоригтон гарсангүй. Ашиглах гэхээр хэл ханз үсгийг нь тайлж чаддаггүй ацан шалаанд оржээ. Уг нь төсвийн хөрөнгө оруулалтаар авч байгаа тул ямар хэл дээр ажилладаг эд болохыг нь эхлээд судлаад мэдчих ёстой байсан ч хариуцлага сэтгэл хоёр дутжээ. Өдгөө энэ тоног төхөөрөмжөө буцааж дарга нарынхаа занаанд орсоноос өөрсдөө хятад хэл сурах нь “зөв шийдэл” болоод байгаа гэнэ.
NUUTS.mn
