Нууц мэдээллийн уурхай

Монголын дарга нар улам бүр ноён зантай болж байгаа аж. Удирдлаганадаа ажиллдаг хүмүүсээсээ дээд зэргийн хүндлэл, хүлцэнгүй байдал шаарддаг болж. УБТЗ-ын төв эмнэлгийн дарга нь сувилахуйн албаны даргаа албан ёсны арга хэмжээний урилга өгсөнгүй, мессеж явуулж хэллээ хэмээн тушаал бууруулсан сурагтай. Гэхдээ тушаал бууруулах шийдвэрт ингэж бичиж таарахгүй тул даргын зөвлөлийн шуурхай хурал хийн хэлэлцээд “ёс зүйн харилцааны хувьд доголдолтой, эмнэлгийн ажилтан хоорондын харилцааны горимыг зөрчсөн” хэмээн албан тушаал бууруулах үндэслэлээ бодож олжээ. Болсон явдал нь тун энгийн бараг инээд хүрмээр зүйл гэнэ. Дэлхийн сувилагч нарын өдрийг тохиолдуулан 5-р сарын 10-ны өдөр эмнэлгийн Сувилахуйн албанаас хүндэтгэлийн арга хэмжээ зохион байгуулахаар болж захиргаа, эмч сувилагч болон хүндэт зочидод урилга урьдчилан тараажээ. Гэтэл эмнэлгийн дарга гуайгаас гадна сургалт шинжилгээ хариуцсан орлогч, аж ахуйн менежер гээд хүндэтгэвэл зохих эрх мэдэлтнүүд өрөөндөө байгаагүй тул урилгыг нь өөрийн биеэр гардуулж чадаагүй аж.  Тэгээд ч ажлын цаг дуусаж орой болсон тул утасдан маргаашийн арга хэмжээнд морилон ирэхийг хүндэтгэлтэйгээр урьжээ. Сувилагч нарын баярын өдрийн арга хэмжээ сайхан болж дуусах үеэр дарга нарын гомдол эхэлжээ. “Эмнэлгийн дарга урилга өгсөнгүй хэмээн уурлаж байна” гэх яриа нь Сувилахуйн албаныхны чихэнд аймшигтай сонсогдоо биз. Удалгүй хүний нөөцийн менежер Нарантуяа дуудаж “чи 2014 оны 5-р сарын 10-ны өдөр даргад мессеж бичсэн байна гэж уурлаж байна, орж уучлал гуй” гэсний дагуу яаран очиж даргаасаа уучлал гуйсан гэнэ. Дарга түүнийг байгууллагын удирдлагыг үл хүндэтгэсэн, ажил үүргийг нь зааварчилсан, үргэлжлэл нь үл ойлгогдох мессеж бичлээ гэж загнаж. Гэтэл ердөө арга хэмжээнд ирэхийг урьсан л агуулгатай байсан гэнэ. Хэрвээ урилгаа хадган дээр тавиад хүндэтгэлтэй гэгч нь өргөн барьсан бол арга хэмжээ авхуулахгүй байсан болж таарчээ. Бид удахгүй төмөр замын дарга нар ажлын алдаа дутагдлаа “Ган зам” сонины жирийн сэтгүүлчид тохож хэлмэгдүүлсэн тухай дэлгэрэнгүй хүргэнэ.

NUUTS.mn