“Гудамж” төсөлд эрхэлсэн ” Парита энд партнерс” гэдэг айхтар нөхөд гарч иржээ
Нийслэл хотын автозамын сүлжээг өргөтгөн хөгжүүлэх, гэр хорооллын дэд бүтцийг цогц байдлаар нь шийдвэрлэх зорилгоор “Гудамж” төсөл хэрэгжиж байгаа. Энэ төслийн цаана ямар маапаантай зүйлс нуугдаж байгаа нь одооноос илэрч байна. Төслийн хүрээнд хуулийн зөвлөх үйл ажиллагаа үзүүлэх компанийг шалгаруулахдаа хамгийн өндөр оноо авсаныг нь сонгоогүй байжээ. Уг нь “Гудамж” төслийн ТҮЗ-ийн 2013 оны 4-р сарын 19-ний өдрийн 10-р тогтоолоор хамгийн өндөр оноо авсан “Эдийн засаг, эрхзүйн зөвлөгөө” компанийг сонгохоор болж. Гэсэн ч төслийн удирдлага ЭЗХЯ зөвшөөрөхгүй байна гэсэн хачирхалтай шалтаг заан өмнө нь гаргасан шийдвэрээ өөрчилж ”Парита энд партнерс” компанийг сонгож “Хууль эрх зүйн зөвлөгөө үзүүлэх” гэрээ байгуулжээ. Гэтэл тендерээр “Эдийн засаг, эрхзүйн зөвлөгөө” компани нь 89 харин гэрээ байгуулсан ”Парита энд партнерс” нь 87 оноо авсан байж. Ингээд маш шуурхай төлбөрөө төлж эхэлжээ. 2013 оны 5-р сарын 16-нд гэрээ байгуулсны дараа 160 сая төгрөгний төлбөрийн 30 хувь буюу 48 саяыг шилжүүлээд гурван сарын 48 сая, зургаан сарын дараа 48 саяыг тус тус шилжүүлж нийт төлбөрийг нь бүрэн төлжээ. Гэтэл хоёр талын гэрээнд хуулийн зөвлөгөө өгсөн ажлын чанар, гүйцэтгэлийг хэрхэн тооцох талаар тодорхой зааж өгөөгүй мөртлөө төлбөрийг нь бүрэн төлсөн нь ”Парита энд партнерс”-д зориуд давуу байдал олгосон гэх хардлагыг төрүүлж байна. Гэтэл энэ компани төлбөрөө бүрэн авсан ч ажлаа сайн хийсэнгүй. Төсөл хэрэгжүүлэгч нэгжээс хуулийн компани нь захиалагч, гүйцэтгэгч нартай хийх гэрээний төслийг боловсруулахдаа хариуцлага болон гэрээ цуцлах нөхцлийг нарийн тодорхой тусгаж өгөөгүйгээс барилгын компаниудтай гэрээ дүгнэхэд хүндрэл гарч байгаа тухай удаа дараа гомдол гаргаж байж. Гэсэн ч энэ бүхнийг нүдээ аньж өнгөрөөгөөд ”Парита энд партнерс”-аас хуулийн зөвлөгөө авах гэрээгээ 2015 оны 5-р сарын 16 хүртэл сунгачихсан байгаагаа “Гудамж” төслийн захирал Б.Батболд хэрхэн тайлбарлах бол…
NUUTS.mn
