Ингээд сууж байсан хоёрыг дайсан болно гэж хэн санах билээ…
Найзаар эхлээд дайснаар дуусдаг нь монгол улстөр юм. Монголын улстөр дэх хамгийн эвлэршгүй дайснууд бол хоёр Эби биш харин Д.Дорлигжав, Х.Тэмүүжин нар боллоо. Тэднийг муудалцуулсан зүйл нь мэдээж албан тушаал эрх мэдэл. Хууль зүйн сайд асан Х.Тэмүүжин өөрийн цахим хуудсаараа баялаг бүтээгчдийг дарамтлан дөрвөн сая долларыг нь хуурайлсан хэргийг задалсан нь явж явж Ерөнхий прокурор асан дээр буулаа. Экс ерөнхий ч тэр дор нь хариу арга хэмжээ авч Хууль зүйн сайд асанг хуулийн байгууллагаар шалгуулахаар болсон. Тэдний энэ дайсагналцал нь эргээд намын нэр хүнд төдийгүй засаглалын тогтвортой байдалд муугаар нөлөөлнө хэмээн намын нөхөд нь эвлэрэхийг шаардаж байгаа аж. Гэхдээ нэг л хүн хэлбэл тэд эвлэрч гар барьж магад. Тэр нь төрийн тэргүүн. Х.Тэмүүжин хуулийн шинэчлэл хийгээд “гялалзуулж” байхад Ерөнхийлөгч Ц.Элбэгдорж “Монгол ийм Хууль зүйн сайдтай нь ямар их аз вэ” гээд шагширч байсан. Тэгвэл Д.Дорлигжав ч түүний багт ордог хүн. “Алтан Дорнод Монгол”-ын талаар тайлбар өгсөн С.Бямбаа с прокурорын хүн гэдэг. Анх алдарт С.Паушокоос компанийг нь салган авахад тэрээр хэрэгтээ захирал нь хийж явсан. Д.Дорлигжавыг “Эрдэнэт”-ийн захирал байхад удирдлаганд нь ажиллаж байсан гээд урьдын хэлхээ холбоо бий. Харин төрийн тэргүүний хувьд хэнийх нь талд орохоо мэдэхгүй байгаа сурагтай. Гэхдээ улстөрд мөнхий найз гэж байдаггүй харин мөнхийн эрх ашиг гэж байдаг хойно “эрх ашгаа” л дагах биз дээ.
NUUTS.mn
