Д.Төмөрхүлэг дэлхийн чансааг тэргүүлнэ
Нийтэлсэн: 2013-05-06 02:47:34
Азербайжаны нийслэл Баку хотноо энэ амралтын өдрүүдээр болж буй жүдо бөхийн “Их дуулга”-ын тэмцээнээс Монголын тамирчид таван медаль хүртээд байна. Тэмцээний эхний өдөр буюу өчигдөр уламжлал ёсоор хөнгөн жингийн барилдаан болж, Монголын 13 тамирчин Бакугийн татамид зодоглосноос хоёр алт, хоёр мөнгө, нэг хүрэл медаль хүртлээ. Тодруулбал, эрэгтэйчүүдийн 60 кг-ын жинд Д.Амартүвшин, 66 кг-д Д.Төмөрхүлэг нар алт, эмэгтэйчүүдийн 48 кг-д Г.Отгонцэцэг, 52 кг-д А.Цолмон нар мөнгө, эмэгтэйчүүдийн 57 кг-ын жинд Д.Сумъяа нар хүрэл медаль хүртлээ.
Олон улсын жүдо бөхийн холбоо (IJF)-ны чансаа олгох шинэчилсэн дүрмийн дагуу “Их дуулга”-ын тэмцээнээс алтан медаль хүртсэн тамирчинд 500 оноо олгох болсон билээ. Харин мөнгө, хүрэл медалийг 300 ба 200 оноо тус тус дагалдаж буй. Тэгвэл, 66 кг-ын жинд өдгөө дэлхийн чансааны гуравдугаарт 1130 оноогоор бичигдээд буй ОУХМ Д.Төмөрхүлэг “Их дуулга”-ын аварга болсноор жингийнхээ ангилалд дэлхийн чансааг тэргүүлэхээр болж байна. Хэдхэн хоногийн өмнө Азийн аварга шалгаруулах тэмцээнээс түрүү хүртэж, чансаандаа 300 оноо нэмсэн тэрбээр “Их дуулга”-д түрүүлснээр чансаагаа 500 оноогоор ахиулж буй юм. ОУЖБХ-ноос томоохон тэмцээн, уралдааны дараа дэлхийн чансааг шинэчлэн гаргадаг бөгөөд энэ удаагийн Бакугийн “Их дуулга”-ын дараа зарлах чансаанд ОУХМ Д.Төмөрхүлэг 66 кг-ын жинг манлайлах болно.
Бакугийн “Их дуулга”-ын хоёр дахь өдөр буюу өнөөдөр эрэгтэйчүүдийн 81, 90, -100 ба +100 кг, эмэгтэйчүүдийн 70, -78 ба +78 кг-ын жинд аваргууд тодорно. Эдгээр жинд Монголын тамирчдаас О.Ууганбаатар /81 кг/, Э.Энхбат /-100 кг/, Ө.Дүүрэнбаяр, Б.Сугаржаргал /+100 кг/ болон О.Жавзмаа /+78 кг/ нар барилдах юм.
