Дэлхийн зулайг зорьсон МУГТ Г.Өсөхбаяр үндсэн аялалаа эхлүүллээ
Нийтэлсэн: 2013-04-16 07:32:54
.jpg)
Монгол улсынхаа далбааг дэлхийн зулайд мандуулах түүхэн аяллаа эхлүүлсэн гавьяат тамирчин Г.Өсөхбаяр энэ сарын 15-нд буюу өчигдөр хойд туйлын 09 цаг, Монголын 16 цагт үндсэн замдаа гарчээ. Тэрбээр хойд туйлын 90 градус хүртэл сансрын шулуун тооцооллоор 110 км замыг туулахаар тооцоолж байсан боловч зам нь шулуун биш томоохон саад, мөсөн уул, ангал тааралдаж байгаагаас учраас ойролцоогоор 200 орчим км зам туулах юм байна. Аяллын багийнхан анх наймуулаа Хойд туйлд очихоор төлөвлөсөн ч нэг нь замаасаа буцсан гэнэ. Ингээд Англи, Австрали, АНУ, Португали зэрэг орны 6 тамирчдын хамт долуулаа дэлхийн зулайг зорилоо.
Монгол улсын Ерөнхийлөгч Ц.Элбэгдоржийн санаачилгаар МУГТ, олон улсын хэмжээний мастер уулчин Г.Өсөхбаяр Хойд туйлд аялахын тулд нарийн төлөвлөлттэй бэлтгэл сургуулилт хийсэн юм. Г.Өсөхбаяр энэ өвлийг Туулын мөсөн дээгүүр явганаар чарга чирэх болон дугуйгаар аялж өнгөрөөсөн бөгөөд гуравдугаар сард Хөвсгөл далай дээгүүр нийт 125 км үргэлжлэх аяллыг хийсэн билээ. Энэхүү дугуйн аялал Хөвсгөл далайн хойд тал болох Ханхаас эхэлж яваад Хөвсгөл далайн дундах Модон хөх арал дээр хүрч байв. Энэ нь түүний аялалд жинтэй хувь нэмэр оруулсан гэж Г.Өсөхбаяр хэллээ.
