Удирдах албан тушаалтнууд лекц сонслоо
Нийтэлсэн: 2013-04-12 06:17:57
Нийслэлийнхний амин чухал хэрэгцээг хангаж хөл дүүжлэх унаагаар залгуулж байдаг нийтийн тээврийн салбарт үйл ажиллагаа явуулдаг аж ахуйн нэгж байгууллагуудын удирдах албан тушаалтнуудад зориулсан сургалт өнөөдөр “АвтобусНэг” ОНӨҮГ-т явагдлаа. Сургалтанд том оврын 24 ААНБ-ын 37 удирдах албан тушаалтнууд хүрэлцэн ирсэн байна. Нийтийн тээврийн үйл ажиллагаа, онцлогт тохирсон лекцийг ШУТИС-ын “Нийгмийн технологийн сургууль”-ийн доктор, ахлах профессор Д.Амаржаргал “Удирлага-ажилтан, ажилтан-ажилтан” хоорондын харилцааны зөрчлийг шийдвэрлэх сэдвийн хүрээнд хамтын ажиллагааг сайжруулах, хамт олны сэтгэлзүй нэгдмэл уур амьсгалтай болгох, итгэлтэй ажиллах сэдэл төрүүлэх, сайн ажилтнуудаа тогтоох, нөлөөллийн аргуудаар онол, практик хосолсон сонирхолтой сургалтыг зохион байгууллаа. Мөн том оврын үйлчилгээ эрхлэгч байгууллагуудаас салбартаа тэргүүлэгч байгууллагын хувьд “Автобуснэг” ОНӨҮГ-ын ерөнхий инженер Б.Энхцаг өөрийн байгууллагын бүтэц, зохион байгуулалт, зорчигч тээвэрлэлтийн менежментийн тогтолцооны талаар нийтийн тээврийн үйлчилгээ эрхлэгч бусад аж ахуйн нэгжүүдэд менежментийн туршлагаасаа хуваалцан хэлэлцүүлэг өрнүүлэв. “Нийслэлийн тээврийн газар”, “Том оврын автобусны үйлчилгээ эрхлэгч” байгууллагаас санаачлан хэрэгжүүлж буй “Аюулгүй тээвэр-Соёлтой зорчигч” аяны хүрээнд зохион байгуулалтын олон ажил хийж байгаа бөгөөд үүний нэг нь шат дараалсан сургалтын арга хэмжээнүүд юм. Аяны хүрээнд нийтийн тээврийн ААНБ-уудын шалгах механик, жолооч, хүний нөөц, бичиг хэргийн ажилтнуудад “Замын хөдөлгөөний удирдлагын төв”, “Сэтгэлзүйн үндэсний төв”-тэй хамтарсан сургалтуудыг зохион байгуулаад байна.
