Газрын төлбөрөө барагдуулах сануулга өглөө
Нийтэлсэн: 2013-03-01 05:44:05
Нийслэлийн Баянзүрх дүүргийн Газрын албанаас өчигдөр сэтгүүлчдэд мэдээлэл хийлээ. Уг мэдээллээр, он дамжсан газрын төлбөрийн өртэй иргэн, аж ахуйн нэгж, байгууллагыг эхний ээлжинд газар эзэмшигчдийн нэрийн жагсаалтыг гарган, олон нийтэд өр төлбөрөө барагдуулах сануулга өгөх нэг сарын аян эхлүүлсэн тухайгаа олон нийтэд мэдээлсэн юм.
“Газрын төлбөрийн тухай” хуульд заасны дагуу газар эзэмшигч иргэн, аж ахуйн нэгж, байгууллагууд улирал бүрийн эхний сарын 25-ны дотор төлбөрөө төлөх үүрэгтэй аж. Хэрэв заасан хугацаанд төлбөрөө төлөөгүй бол “Татварын ерөнхий хууль”-ийн дагуу төлөгдөөгүй үнийн дүнгийн 50 хүртэлх хувиар алданги тооцдог.
Дүүргийн хэмжээнд 12 сургууль, цэцэрлэг шинээр барих хөрөнгийн асуудал шийдэгдсэн боловч барих газар олдохгүй байгаа аж. Тиймээс заасан хугацаанд төлбөрөө барагдуулаагүй тохиолдолд шүүхийн байгууллагад шилжүүлэх, газар эзэмших, ашиглах эрхийг хүчингүй болгох ажлыг зохион байгуулахаар төлөвлөсөн байна.
Одоогийн байдлаар, дүүргийн хэмжээнд газрын төлбөрийн үлдэгдэлтэй буюу 1-2 жилийн хугацаанд төлбөрөө төлөөгүй 47 иргэн, аж ахуйн нэгж байгууллага байгаа юм. Дашрамд дурдахад, Баянзүрх дүүргийн Өмч, газрын харилцааны алба энэ жил хоёр тэрбум далан сая төгрөг бүрдүүлэх төлөвлөгөөтэй ажиллаж байна.
