Бэлэг бэлгийн дээд “Ертөнц” цомог
Нийтэлсэн: 2013-01-31 04:06:44
“Introduction to Nomads” цомгоос хойш “chill out” төрлийн хөгжмөөр цангаж байсан хөгжмийн хорхойтнуудын сонорыг мялаан, талархалыг нь хүлээгээд байгаа “Ертөнц” цомог БНСУ-руу дахин хэвлэлтэнд явсан тухай бид өмнө нь мэдээлж байсан. Худалдаанд гараад арваад хоногийн дараа дахин хэвлэлтэнд явдаг өөр ямар ч цомгийн тухай сонсож байгаагүй бидний хувьд энэ нь нэг талаар сонирхолтой байсан хэдий ч нөгөө талаар гарцаагүй сайн уран бүтээл болж чадсантай нь эвлэрч суусныг нуух юун. Тэр ч бүү хэл “Ертөнц” цомгийг 10, 20 бүр 50-аар нь хүртэл худалдан авч байгаа хүн таарах болсон нь сар шинэ болох гэж байгаатай холбоотой байж. Үнэхээр ч уран бүтээлчдээс асар их хөдөлмөр шаардсан, оюуны үнэт бүтээл болохын хувьд хөгжмийн зохиолч Г.Ононгийн “Ертөнц” цомог сар шинийн өдрүүдэд дуу хууранд дуртай Монгол түмний минь хамгийн эрхэм хэн нэгэндээ барих хамгийн үнэтэй басхүү нандин бэлэг болж байгааг сайшаахгүй өнгөрч чадсангүй. Оюуны бүтээл тэр дундаа уламжлал шинэчлэлийг хослуулсан гайхамшигт “Ертөнц” цомог энэ сар шинээр өөрийгөө ч, ойр дотны хүмүүсээ ч үндэсний баяраа ч хүндэлдэг хэн бүхний хувьд эрхэм хүндээ барих бэлэг бэлгийн дээд болсон байна.
Г.ДАША
