Маргааш томоохон зах, худалдааны төвүүд амарна
Нийтэлсэн: 2012-11-20 03:53:36
Орон нутгийн ээлжит сонгууль энэ сарын 21-нд буюу маргааш болно. Тэгвэл энэхүү санал авах өдөртэй холбогдуулан Нийслэлийн Засаг дарга Э.Бат-Үүл захирамж гаргажээ.
Тухайлбал, иргэдийн сонгуульд оролцох нөхцөлийг бүрдүүлэх үүднээс "Нарантуул", "Хархорин", "Да Хүрээ", "Өгөөмөр" зах болон "100 айл", "Гурвалжин" орчмын барилгын материалын томоохон худалдааны төвүүд ажиллахгүй амрах аж. Ингэхдээ долоо хоногт хуваарийн дагуу амардаг өдрөөрөө ажиллаж сонгуулийн өдөрт шилжүүлэн амрах юм байна. Мөн энэ өдөр нийслэлийн нутаг дэвсгэрт архи, согтууруулах ундаа худалдах, түүгээр үйлчлэхгүй байхыг анхааруулжээ.
Түүнчлэн сонгуулийн санал авах үед нийслэлийн нутгийн захиргааны холбогдох байгууллага, сонгуулийн тойрог, хэсгийн хороодыг хэвийн ажиллах нөхцөл бололцоог бүрдүүлэх, санал авах байрыг телефон утас, цахилгаан эрчим хүчээр таслахгүй, найдвартай хангах, хотын нийтийн тээврийн үйлчилгээг хэвийн явуулах талаар хэд хэдэн зохион байгуулалтын арга хэмжээ авч ажиллахыг Хотын захирагч холбогдох газруудад үүрэг болгосон байна.
