Хэнтийд сонгуулийн хууль зөрчсөн хэд хэдэн ноцтой зөрчил гарчээ
Нийтэлсэн: 2012-11-18 11:04:13
Хэнтий аймагт орон нутгийн сонгуулийн хууль зөрчсөн хэд хэдэн тохиолдол илэрчээ. Үүнийг иргэд дүрс бичлэгээр баримтжуулан МАН-ын сонгуулийн штабт өгсөн байна.
Үүнд үндэслэн МАН-ын сонгуулийн штабаас аймгийн Сонгуулийн хороонд гомдол гаргажээ.
Тухайлбал, Хэнтий аймгийн Хэрлэн сумын 5 дугаар багт аймгийн ИТХ-ын сонгуульд нэр дэвшигч Д. Аюурбунь нь 2012 оны 11 дүгээр сарын 9-нд тус багийн Саригийн 3 тоотод амьдрах иргэн Д.Хандаагийнд Аймгийн нэгдсэн эмнэлэгийн их эмч, Хэрлэн сумын ИТХ-ын сонгуульд нэр дэвшигч М. Ариунаагийн хамт сурталчилгаа хийжээ. Ингэхдээ АН-аас нэр дэвшигчдийн танилцуулга, зурагт материалыг 10000 төгрөгийн хамт өгсөн байна.
Мөн Хэнтий аймгийн Хэрлэн сумын 4 дүгээр багт Хэрлэн сумын ИТХ-ын сонгуульд нэр дэвшигч З.Батбаяр нь ээлжит сонгуулийн жил эхэлснээс хойш, сонгуулийн сурталчилгааны явцад буюу 2012 оны 11 дүгээр сарын 13-нд сонгогчийн санал татах зорилгоор Хэрлэн сумын 4 дүгээр багийн иргэн одоогоор 5 дугаар баг Саригийн 5-16 тоотод түр оршин суух Мягмаржавынд 0,5 м3 модыг үнэ төлбөргүйгээр тусламж нэрийн дор өгсөн байна.
Бэрх хотын Ардчилсан намын дарга Х.Баасанжав 11 дүгээр сарын 4-ний өдөр намын байрандаа иргэдийг цуглуулан уулзах үеэрээ Ардчилсан намд санал өгөөрэй гэж хүн тус бүрт 10000 төгрөг өгчээ.
Эдгээр үйлдлүүд нь Аймаг, сум, дүүргийн ИТХ-ын сонгуулийн тухай хуулийн 34 дүгээр зүлийн 34.8.9 дэх заалт, 28 дугаар зүйлийн 28.9.4-дэх заалт, 33 дугаар зүйлийн 33.3, 34.6.1 дэх заалтуудыг тус тус зөрчсөн үйлдэл болжээ.
Иймд МАН-ын сонгуулийн штабын дарга Ц.Лхагвасүрэн аймгийн Сонгуулийн хороонд гомдол гаргаж, АН-аас Хэрлэн сумын ИТХ-ын сонгуульд нэр дэвшигч М.Ариунаа, Бэрх хотоос аймгийн ИТХ-д нэр дэвшигч Г.Тайванжаргал, сумын ИТХ-д нэр дэвшигч Х.Баасанжав, С.Цэцэгмаа, Г.Үүрийнцолмон нарыг хуульд заасны дагуу нэрсийн жагсаалтаас хасуусалахаар шаардлага хүргүүлсэн байна.
Ц.Лхагвасүрэн Сонгуулийн хэсгийн хороонд гаргасан гомдолдоо иргэн Төмөржан, Чулуунсүх нарын тайлбар, мөнгө тараасан талаарх иргэн Д.Хандаа, Гоёхончимэг, Чулуунсүх, Эрдэнэцогт нарын яриаг дүрс бичлэгээр баримтжуулжээ.
Сонгуулийн хэсгийн хороо хууль зөрчсөн эдгээр асуудлыг хэрхэн шийдсэн нь одоогоор тодорхойгүй байна.
