Нууц мэдээллийн уурхай

БШУЯ, Мэдээлэл, харилцаа холбооны зохицуулах хороо, Хүүхдийн төлөө үндэсний газар, Нийслэлийн Цагдаагийн газар хамтран өчигдөр “Хүүхдийг интернэтийн аюулаас хамгаалах аян”-ыг эхлүүллээ. Аяны хүрээнд дунд сургуулийн сурагчид, цагдаа нартай хамтарч интернэт, PC тоглоомын газруудад гэнэтийн шалгалт хийв. Шалгалтад дунд сургуулийн сурагчдыг оролцуулсан нь тэднийг интернэт, комьпютер тоглоомын зохисгүй хэрэглээний хор уршгийн талаар ойлголттой болгох зорилготой юм байна.

Сүхбаатар дүүрэгт гэхэд интернэт, PC тоглоомын 79 газар байдаг аж. Тус дүүргийн 16 дугаар сургуулийн “Өсвөрийн цагдаа” бүлгэмийн 12 сурагч, цагдаагийн ажилтнуудтай хамтран сургуулийнхаа ойр орчмын интернэт, PC тоглоомын найман газарт шалгалт хийж, Нийслэлийн цагдаагийн газраас гаргасан санамжийг тоглоомын газрынханд өглөө. Сүхбаатар дүүрэгт байрлах “Colt arena” PC тоглоом, интернэт кафег ажиллуулдаг Г.Энхтайван “Манайх 25 компьютертэй. Өдөрт ойролцоогоор 100 орчим хүн үйлчлүүлдэг. Бага насны хүүхдүүдийг оройн цагаар тоглуулдаггүй. Сүүлийн үед хяналт, шалгалт их байгаа. Байрны түрээсэнд сард 600 мянган төгрөг төлдөг” хэмээн ярив.

БШУЯ-ны хэвлэлийн төлөөлөгч Ч.Лодойсамбуу “Аяны дараагийн ажил нь Интернэтийн зохистой хэрэглээг зохицуулах хуулийн төсөл боловсруулж, УИХ-д өргөн барих юм. Хууль батлагдаж хэрэгжсэнээр хүүхдүүд гэртээ болон интернэт кафед тоглохдоо хууль бус программ ашиглах, садар самууныг сурталчилсан сайтуудад нэвтрэх, вирус тараах, хориотой дуу, дүрс татаж авах боломжгүй болно. Харин хуулийг хэрэгжүүлэхэд шаардагдах техникийн шийдлийг БШУЯ-ны холбогдох мэргэжилтнүүд судалж байна” гэв.


 Э.Эрдэнэцэцэг