Мянганы хамгийн баян хүмүүсийг нэрлэжээ
Нийтэлсэн: 2012-10-18 10:32:23
.jpg)
Энэтхэгийн бүрэлдэхүүнд хараахан ороогүй байсан Хайдарабадын хаант улсын сүүлчийн хаан буюу 1911-1948 онд төр барьж байсан Осман Али Кханыг бүх цаг үеийн хамгийн баян энэтхэг хүнээр нэрлэжээ. Инфляцийг харгалзан үзээд түүний хөрөнгийг тооцвол өнөөдрийн хэмжүүрээр 236 тэрбум доллар болно гэж "Селебрити нет уорс" цахим хуудсанд бичсэн байна. Ийм судалгааг "Хинду" сонины мэдээллийн алба хийж байгаа аж.
Оман Али Кхан баячуудын жагсаалтын зургадугаарт Оросын хоёрдугаар Николай хааны дараа оржээ. Оросын хааны хөрөнгийг судлаачид 300 тэрбум доллароор үнэлсэн байна.
Мянганы хамгийн баян хүнээр XIV зуунд төр барьж байсан, Дундад зууны үеийн Мали улсын дээд удирдагч Манса Мусаг нэрлэжээ. Тэрбээр 1324 онд 60 мянга гаруй хүн дагуулан хаж мөргөл үйлдэж явсан алдартан аж. Түүний хөрөнгө одоогийн ханшаар 400 тэрбум доллароор хэмжигдэж байна.
Жагсаалтын эхний гуравт 350 тэрбум доллароор хөрөнгө нь үнэлэгдсэн Германы банкны эзэн Майер Амшель Ротшильд, 340 тэрбум долларын хөрөнгөтэй, үйлдвэрийн эзэн Жон Дэвисон Рокфеллер нар багтжээ. Тэгвэл эхний аравт аж үйлдвэрийн эзэн Эндрю Карнеги, Английн хаан нэгдүгээр Вильгельм, Ливийн удирдагч агсан Муаммар Каддафи, автомашин үйлдвэрлэгч Хенри Форд, хөлөг онгоцны эзэн Корнелиус Вандербильд нар орсон байна.
Энэ жагсаалтад орсон 25 чинээлэг хүмүүсийн гурав нь буюу Билл Гейтс, Уоррен Баффет, Мексикийн Карлос Слим нар өнөөдөр энх тунх байгаа юм.
З.Амгалан
