Нууц мэдээллийн уурхай

ЗХУ-ын үед бараг л улсын нууцын маш нууц зэрэглэлд авч үздэг байсан нэгэн мэдээлэл ил боллоо. Энэ бол Октябрийн хувьсгалын удирдагч В.И.Лениний тухай ард түмнээсээ бараг нэгэн зууны турш нууж ирсэн угсаа гарлынх нь тухай үнэн юм. Түүнийг бараг л монгол цустай халимаг угсааны хүн гэж цуурдаг байсан нь огт худал байжээ. Учир нь юу гэвэл Лениний өвөг дээдэс дунд жүүд буюу еврей хүн байсан юм байна. Тийм учраас еврейн эсрэг үзэлтнүүд энэ мэдээллийг буруугаар ашиглана гэж үзээд тухайн үеийн зөвлөлтийн удирдлагууд үүнийг хав даран нууцлах болжээ.
Саяхан Америкийн профессор Йоханан Петровский-Штерны “Лениний еврейн асуудал” гэсэн нэртэй ном хэвлэгдэн гарсан байна.
Тус номонд дурдсанаар Лениний өндөр өвөг Мошко Бланк нь цэвэр еврей хүн байсан аж. Германы Sueddeutsche Zeitung сонинд энэ номын тухай хэвлээд үнэхээр Лениний еврей өвгийн тухай баримт ховор байдгийг дурджээ. Харин түүний өндөр өвөг Бланк нэлээд хижээл насандаа Христийн сахил хүртэж загалмайн шашинд орсон агаад Лениний өвөө Исрайль нь швед гаралтай герман бүсгүй Анна Гроссчоптой гэрлэсэн гэнэ. Йоханан Петровский-Штерн мөн тус номондоо Ленин өөрөө хүртэл өндөр өвөгт нь цэвэр цусны еврей байдаг байсныг мэддэггүй байсан хэмээн баталсан байна.
Германы Sueddeutsche Zeitung сонин Ленин хэн байсан нь ямар ч хамаагүй тэр бүү хэл тэрээр Итали, Ирланд байсан ч дэлхийн түүхэнд өөрөөр нөлөөлөхгүй байсан хэмээн бичсэн нь л харин үнэний хувьтай байж мэдэх юм. Бас коммунист үзэл суртлыг “еврейчүүдийн хуйвалдаан” гэж үздэг үзлийг хүртэл арилгаж чадахгүй биз ээ.
С.Майкл