Нууц мэдээллийн уурхай

Монголбанкыг уруудуулсан Н.Золжаргалын шуугиан олныг цочроолоо. Олон булхай дунд нь ажилтнууддаа байрны дэмжлэг нэрээр тарааж өгсөн 3,7 тэрбум төгрөгийн маапаан ордог. Энэ жагсаалтыг гишүүн асан Г.Уянга дэлгэж байсан агаад тэр үед одоогийн УИХ-ын гишүүн, тухайд үед Монголбанкны дэд ерөнхийлөгч байсан Ардын намын Б.Жавхлан яаран сандран гүйж ирж гаргахгүй байхыг гуйж байсан гэдэг.

Г.Уянгын дэлгэсэн жагсаалтаас харахад Төвбанкныхан арай дэндүү даварсан нь илт харагдсан. .Золжаргалын  зөвлөх, Монголбанкны ерөнхий эдийн засагч С.Болд л гэхэд 180 төгрөгийн буцалтгүй тусламж авсан.  Араас нь 139.5 саятай Хяналт шалгалтын газрын захирал Д.Ганбат, Дотоод хяналт, үйл ажиллагааны эрсдэлийн газрын захирал Х.Дэлгэр нар шил даран орсон бол тамгын газрын дарга Д.Чимэд-Юндэндээ ердөө  90-хэн саяыг өгсөн нь дараа нь жаахан “алагчилсан” болчихсон гэдэг. Олон нийтийн дургүйцлийг асар ихээр төрүүлсэн энэ үйл явдлын дараа Монголбанкинд Г.Уянгын мэдээлэгчийг олж илрүүлэх өргөн хүрээний ажиллагаа явагдсан. Ердөө маргааш л “эзнийг” нь олчихсон байжээ. Тэр нь Монголбанкны Валют, эдийн засгийн газрын Санхүүгийн зах зээлийн хэлтсийн ахлах эдийн засагч Ш.Чулуунбаатар болж таасан.  Тэр оройдоо Аюулгүйн албаны дарга нь ажлын компьютерийг нь хураан авч тэр дороо л байгууллагдаа хамгийн их үзэн ядагдсан хүн болон хувирсан. Дөрөв хоногийн дараа ажил тарснаас хойш Монголбанкны Ерөнхийлөгч Н.Золжаргал удирдлагын хамт дуудаад Г.Уянгад мэдээлэл дамжуулсан, нууц задруулсан гэж дайрсан.

Ахлах эдийн засагч буруугүй гэдгээ хэлсэн боловч итгэх хүн гарсангүй. Дотоод хяналт шалгалтаар өөрийн ажил үүрэгт үл хамаарах,  “байгууллагийн маш нууц” зэрэглэлийн мэдээлэлийг албан тушаалын байдлаа ашиглан FRC программаас олж авсан хадгалсан чинь тогтоогдсон гээд маргаашнаас нь буюу 3 сарын 11-ний өдрөөс хоёр сарын цалингүй чөлөө өгчээ. Чөлөөний хугацаа дуусаад ажил дээрээ иртэл харуул нь оруулсангүй. Тэр өдрөө ажилдаа буцаж орох хүсэлтээ Тамгын газарт  гаргаад буцжээ. Сар гаруйн дараа Тамгын газрын Хүний нөөцийн хэлтсийн захирал Эрдэнэтуяа  дуудаж “мэдээлэл задруулсан хэрэгт чамайг буруутгаж байгаа, чи өөрөө өргөдлөө өгөөд ажлаас гарч болно” гэснийг ажилтан хүлээж аваагүй аж. Монголбанкныхан мөнгө хувааж авсан мэдээллийг Г.Уянгад дамжуулсан гэх ажилтандаа маш их хорсож занасан бололтой. Түүнийг ажлаас нь халаад зогсохгүй Эрүүгийн хууль, Авлигын эсрэг хуулинд заасны дагуу албаны эрх үүрэг буюу албан тушаалаа урвуулан ашигласан гэх үндэслэлтэй гэж үзээд саяхан АТГ-д шалгуулахаар өгсөн. Мөн Чингэлтэй дүүрэг дэх Цагдаагийн 1-р хэлтэсд өгч эрүүгийн хэрэг үүсгэсэн. Гэсэн Чингэлтэй дүүргийн Прокурорын газрын хяналтын прокурорын 2016 оны 10-р сарын 12-ны өдрийн 1177 дугаар тогтоолоор Ш.Чулуунбаатарт холбогдох эрүүгийн хэргийг хэрэгсэхгүй болгосон. Үүний хамт шүүхээс ажилд нь эргүүлэн тогтоох шийдвэр гаргасан ч Монголбанк нь одоо болтол шүүхийн шийдвэрийг сайн дураар биелүүлэхгүй, ажилд нь авахгүй байна. Ийнхүү түүний нэр холбогдсон асуудалд Н.Золжаргал тэргүүтэй удирдлагууд нь буруутай болох нь тогтоогдоод байхад одоогийн удирдлага нь нааштай хандахгүй байгаа нь гайхал төрүүлж байна.

 

НУУЦ.мн