Нууц мэдээллийн уурхай

 Монголын томоохон бизнесмэнүүдийн дунд олон жил үргэлжилсэн цусгүй тулаан энэ зун дуусжээ. “Моннис”-ын Б.Чулуунбаатар, “Эйр сервис нью” компаний захирал Д.Туул болон “А-Жэт лимитэд” компанийхан ширээ тойрон сууж байгаад эвлэрлийн гэрээнд гарын үсэг зурсанаар шил даран үргэлжилсэн эрүү, иргэн холилдсон, залилсан мэхэлсэн гэх том шуугианыг цэглэсэн. Болсон явдлыг тоймлон дурдахад Д.Туул хатагтай 2007-2011 онд “Чингис хаан” нисэх буудлын талбайд нисэх онгоцны Ангарын барилга байгууламжийг барьж өөрийн нэр дээр өмчлөх гэрчилгээгээ авчээ. Улмаар “Аэро Монголиа” компанитай хийсэн аман гэх тохиролцоогоор 2012 оны хавраас түрээслүүлэхээр болжээ. Гэтэл Б.Чулуунбаатарын компани түрээсээ төлөхгүй “гүрийгээд” эхэлж. Захирал хатагтай обьектоо чөлөөлүүлж авахаар хууль хүчнийхэнд хандан шүүхдэх, битүүмжлүүлэх зэрэг арга хэмжээ авсан. Харин “Моннис интернэйшнл” нь бид энэ барилгын хууль ёсны зэмшигч, “А-Жэт лимитэд” компанитай байгуулсан гэрээгээгр 2012 онд худалдаад авчихсан гэсэн зүйл ярьдаг байсан. Б.Чулуунбаатар нь Ангарын барилгыг худалдаж аваад өөрийн нисэхийн охин компанидаа өгчээ. Гэтэл хажуунаас Д.Туул гэдэг эмэгтэй гарч обьект булаацалдаад эхэлсэн гэнэ. Баримт болгон Ангарын барилгыг улсын комиссын хүлээн авсан акт гэх 121\2007 гэсэн дугаартай хоёр бичиг гаргаж иржээ. Хариуд нь “Моннис”-ынхан 2007 онд улсын комисс хүлээн авсан барилгын жагсаалтад Ангарын барилга гэж ороогүй болно гэсэн НМХГ-ын лавлагааг үзүүлж. Ингээд Д.Туул захирал улсын комисс хүлээж аваагүй байхад өмчлөх эрхийн гэрчилгээ гаргуулан, улсын бүртгэлд бүртгүүлчихсэн сүйхээтэй бизнес хатагтай болж таарчээ. Ердөө барилгын гүйцэтгэгч байсан атлаа барилга архитектурын зураг дээрх “А-Жэт лимитэд” гэсэн нэрийг дарж өөрийн компаний нэрийг биччихсэн, хуурамч баримт үйлдэн бусдын өмчийг авах гэсэн хэмээн “Моннис”-ынхан цагдаад өгч эрүүгийн хэрэг үүсгүүлж. Энэ бүх тэмцлийн үед “А-Жэт лимитэд”-ийн нэр сонсогдодгүй байсан. Сүүлдээ арга буюу ил болж гэхдээ Б.Чулуунбаатарын талд орсон гэнэ. Эхэндээ Д.Туул хатагтай нь Ангарын барилгын гүйцэтгэгч харин Х.Наранхүү нь хөрөнгө оруулагч байжээ. Тухайн үед буюу 2007 онд барилгын гүйцэтгэл дутуу байсан тул хоёр тал тохиролцон өмчлөх эрхийн асуудлыг түр хойшлуулаад байж. Уг барилгыг гүйцээн барихын тулд 20 гаруй тусгай зөвшөөрөл нэмж авах хэрэгтэй байсан мөн дутуу баригдсан барилгыг өөртөө авах нь хөрөнгө оруулагч талд ашиггүй тусаж. Энэ үед нь нисэх компанитай болсон Б.Чулуунбаатар орж ирж. Гайхалтай нь маш том бизнесийн гэрээг аман гэрээгээр тохиролцож хийсэн байж. Ингээд дутуу баригдсан Ангарын барилгыг 1.5 сая гэж үнэлээд хөрөнгө оруулагч Х.Наранхүүд 1.4, гүйцэтгэгч Д.Туулд 100 мянган доллар төлөхөөр болжээ. “Эйр сервис нью”-д нийт 97 сая төгрөгөөс гадна үл хөдлөх хөрөнгийн татварын 25 сая төгрөгийг нь хүртэл өгсөн гэнэ. Гэсэн ч захирал хатагтай нь хусам өглөө хэмээн барьцаа чангалж тоглоомоо үргэлжлүүлсээр байж. Учир нь түүний нэр дээр Ангарын үл хөдлөхийн гэрчилгээгээс гадна газрын зөвшөөрөл нь давхар гарсан байжээ. Эцэст нь тэрээр зорилгодоо хүрч нөгөө хоёр талаа буулгаж авч. Гэхдээ нэлээд буулт хийсэн нь нэмж авахаар болсон 200 мянган долларын дэргэд юу ч биш биз. Гурван талын эвлэрлийн гэрээгээр Д.Туул хатагтай Ангарын барилгын өмчлөх эрхээсээ татгалзаж газрын зөвшөөрлийг нь хүртэл буцааж өгчээ. Энэ талаар өмнө нь гаргасан бүх нэхэмжлэл шаардлагаасаа татгалзаж ахин хэл ам гаргахгүй гэсэн үүрэг давхар хүлээсэн гэнэ. “А-Жэт лимитэд” нь 200 мянган доллар нэмж төлөөд обьект газраа авч. Харин “Моннис интэрнэйшнл” нь цаашид Ангарын барилгыг газар доорхи обьекттой нь хамт үргэлжлүүлэн ашиглахаар болжээ. Түүнээс гадна бас нэгэн том ялалт байгуулсан нь “Эйр сервис нью” компаний захирал Д.Туул нь Ангарын барилгын маргааны талаар өдөр тутмын нэгэн сонины эрхлэгчтэй хамтран буруу ташаа мэдээлэл олон нийтэд хүргэсний төлөө Б.Чулуунбаатараас албан ёсоор уучлал гуйж залруулга гаргах үүрэг хүлээсэн гэнэ. Манай сайт өнгөрсөн хавар “Аэро Монголиа” нь хэрхэн “Моннис”-ынх болсон талаар цуврал нийтлэл гаргасан. Үүний төлөө цагдаад шалгагдсаны дээр өдөр тутмын нэгэн сонины эрхлэгч миний сэдвийг бичлээ, шүүхэд өгнө хэмээн шахалт үзүүлж байсан.