Нууц мэдээллийн уурхай

“Зууны манлай заан“ Долгорсүрэнгийн үр хүүхдүүдэд “Үндэсний хөрөнгө оруулалтын банк” харьяалагддаг.  Энэ гэр бүлийн бизнесийн асуудлыг хариуцаж байсан Д.Сумьяабазар улс төрд хөл тавьсан тул ТУЗ-ын дарга гэдэг албан тушаалаасаа хуулийн дагуу татгалзсан. Гишүүн аваргын эхнэрийн  төрсөн эгч Ч.Маралмаа нь гэр бүлийн төлөөлөл болон  Үндэсний хөрөнгө оруулалтын банкны ТУЗ-ийн гишүүн болж улмаар Аудитын хороонд нь ажиллах болсон. Аварга гишүүний удирдаж байсан банк их хэмжээний орлого олоод татвар төлөөгүй ноцтой зөрчлийг саяхан илрүүлжээ. Банк зээлүүлдэг болохоос зээлдэггүй гэдгийг бүгд мэднэ. Гэхдээ  ҮХОБанк зээл авч байжээ. Зээлэхдээ офшор бүс гэдгээрээ алдаршсан Виржини аралд бүртгэлтэй бүр “Могул Ресурс инк” гэдэг компаниас 2010 оны 11-р сарын 29-нд хоёр тэрбум төгрөгийг 21 хугацааатай зээлжээ. Барьцаанд нь “Шарын гол” ХК-ны нэг бүр нь 3500 төгрөгийн үнэтэй 1.2 сая ширхэг хувьцааг тавьсан гэнэ. Гэрээний хугацаа дуусахад ҮХОБанк зээлээ төлж чадаагүй тул “Могул ресурс” 1.2 сая ширхэг хувьцааг нь эзэмшилдээ авч. Улмаар түүнээсээ 200 мянган ширхэгийг нэг бүрийг нь 16 мянган төгрөгөөр зараад л 3.2 тэрбумын ашиг олсон гэнэ. Д.Сумьяабазарын ҮХОБанк тухайн онд “Шарын гол”-ын 1.6 сая ширхэг хувьцаагаар нийт долоон зээлдэгчээс авсан 5,6 тэрбумын зээлийн өрийг хаажээ. Мөн банк өөрөө 400 мянган ширхэг хувьцааг “Үнэт цаас төлбөр тооцоо төвлөрсөн хадгаламжийн төв”-аар дамжуулан борлуулж 2,6 тэрбумын орлого олсон гэнэ. Энэ хэргийн халуун мөрөөр татварынхан өнгөрсөн жилд орсон. ҮХОБанк, Виржини арлын “Могул ресурс инк”-ын хувьцаа барьцаалсан, өрөндөө өгсөн дараа нь борлуулсан хэргийг тухай мэдээлэл “Үнэт цаасны төлбөр тооцоо, төвлөрсөн хадгаламжийн төв”, “Шарын гол” ХК-иас болон  “хөндлөнгийн этгээдээс” ирсэн гэжээ.  Үүнээс “хөндлөнгийн этгээд” нь хэн байсан гэдэг нь сонирхол татаж байгаа аж. Татварынхан том наймааны араас орсон тул хувьцаа барьцаалсан асуудлаас нь илүүтэйгээр хуулийн дагуу татвар төлсөн эсэхийг нь шалгаж. Гэсэн ч ҮХОБанк, Виржини арлын “Могул ресурс инк”-ийн аль нь ч татвар төлөөгүй байжээ. Аварга гишүүний удирдаж байсан банк нь ашиг олчихоодтатвар төлөөгүй явсаныг  өдгөө хэрхэн тайлбарлах бол… ҮХОБанк нь “Шарын гол”-ын 400 мянган ширхэг хувьцааг “Үнэт цаас төлбөр тооцоо төвлөрсөн хадгаламжийн төв”-аар дамжуулан борлуулж 2,6 тэрбумын орлогод нь  364,4 сая төгрөгийн нөхөн татвар, 109,3 саяын торгууль, 182,2 саяын алданги оногдуулж нийт 655,9 сая төгрөг төлөхийг шаардаж. Банк мэдээж үүнийг нь хүлээн зөвшөөрсөнгүй.  Сүүлийн үед манай банкныхан татварын байцаагчдын оногдуулсан акт төлбөрийг төлөхгүй заргалддаг улмаар хүчингүй болгуулдаг нэгэн жишиг тогтоод байна. “Могул Ресурс Инк”-д ч хувьцаа худалдан борлуулсны 3.2 тэрбумын орлогод нь 243.4 саяын нөхөн татвар, 73 саяын торгууль, 121 саяын алданги тооцон нийт 438.2 сая төгрөгийн төлбөр ногдуулжээ. Өдгөө Д.Сумъяабазарын удирдаж байсан банк татварын байцаагчдын актыг хүчингүй болгуулсан бол Виржини арлын компани төлөхдөө тулаад байна./үргэлжлэл бий/



NUUTS.mn