16 компани нь нийт 44,900,000,000 төгрөгийн хөнгөлөлттэй зээлийг зориулалтын бусаар зарцуулжээ
Шинэчлэлийн гэх Засгийн газрын үед асар их мөнгө гарын салаагаар урсан алга болсон нь эхнээсээ илэрч эхэлжээ. Н.Алтанхуягийн Засгийн газар 2012 оны аравдугаар сард Монголбанктай “Гол нэрийн бараа, бүтээгдэхүүний үнийг тогтворжуулах дунд хугацааны хөтөлбөрийг хамтран хэрэгжүүлэх харилцан ойлголцлын санамж бичиг”-ийн байгуулсан. Хөтөлбөрийн хүрээнд дөрвөн дэд хөтөлбөрийг холбогдох байгууллагуудтай хамтран батлаж, хэрэгжүүлсний нэг нь 2013 онд Монголбанкны ерөнхийлөгч Н.Золжаргал, Барилга хот, байгуулалтын сайд Ц.Баярсайхан нарын хамтарсан А-2/06 тоот тушаалаар батлагдсан “Барилгын салбарыг дэмжих, улмаар орон сууцны үнийг тогтворжуулах” дэд хөтөлбөр . Гэтэл дэд хөтөлбөрийн хүрээнд үнэ тогтворжуулах гэрээ байгуулж ажилласан цемент, ган туйван нийлүүлэх аж ахуйн нэгжүүд их хэмжээний хөрөнгийг зориулалтын бусаар завшсан нь саяхан илэрсэн гэнэ. ШӨХТГ-аас гэрээний үүргийн биелэлтэд шалгалт хийхэд “Монос констракшн” ХХК, “Монтул” ХХК, “Бүрд констракшн” ХХК, “Очир ням” ХХК, “Мост интернешнл” ХХК, “Орд гео” ХХК, “Төмөр транс” ХХК, “Таван богд трейд” ХХК, “Кью эс си” ХХК, “Пума” ХХК, “Анимук” ХХК, “Мөнгөн балгиа” ХХК, “Энх дөлгөөн далай” ХХК, “Баялаг говь” ХХК, “БОСБД” ХХК, “БТТ Инженеринг” ХХК зэрэг 16 компани нь гэрээний үүргээ зөрчиж, нийт 44,900,000,000 төгрөгийн хөнгөлөлттэй зээлийг зориулалтын бусаар зарцуулсан нь тогтоогдсон байна. Дээрх байгууллагуудыг шалгуулахаар удахгүй хууль хяналтын байгууллагад хандахаар болоод байгаа ажээ. Ган туйван, цементийн үнэ тогтворжуулах гэрээний 6.2-т заасны дагуу дээрх гэрээний үүргээ зөрчсөн 16 компанийн хөтөлбөрийн хүрээнд авсан хөнгөлөлттэй зээлийг банкны зээлийн хүүгээр тооцон төлүүлэх юм байна. Мөн тендерт оролцох эрхээ хязгаарлуулсан этгээдийн бүртгэлд бүртгүүлэх асуудлыг холбогдох байгууллагуудад тавихаар болжээ.
NUUTS.mn
