“Эрдэнэт” үйлдвэр Эрдэнэтийн эмч нарыг “авилгалаар” айлгадаг
Нийтэлсэн: 2015-01-26 02:05:48
Эрдэнэт үйлдвэрт оросууд дархан эрхтэй дургиж байхад үйлдвэрлэлийн осол мэргэжлээс шалтгаалах өвчнөөр өвдсөн бүр амь насаа алдсан монгол ажилчид тэтгэмж нөхөн төлбөрөө ч авч чаддаггүй гэнэ. Учир нь захиргаа нь аль болохоор өгөхгүй гэж элдэв арга саам хайдаг. Тухайн ажилтан мэргэжлээс шалтгаалах өвчнөөр /МШӨ/-өөр нас барсан эсэхийг задлан шинжилгээ хийж байж тогтоодог. Тэгвэл Эрдэнэтийн Бүсийн оношлогоо эмчилгээний төв нь “МШӨ-өөр нас барсан гэсэн дүгнэлт гаргах юм бол хахууль авсан гээд шүүх цагдаад өгнө гэж танай дарга нар айлгадаг” гэж шалтаглаад задлан шинжилгээ хийж өгдөггүй хэвээрээ л байна. Хэрвээ үйлдвэрийн ажилтан МШӨ-өөр насбарсан нь тогтоогдвол ар гэрт нь 36 сарын цалинтай нь тэнцэх хэмжээний тэтгэлэг өгөх журамтай тул үйлдвэрийн дарга нар энэ мөнгөндөө гар татаад сүйд болдог гэнэ. Эрдэнэтийн Барилга засварын цехэд тасралтгүй 19 жил ажилласан Н.Э гэдэг будагчин эмэгтэй хүнд хортой нөхцлийн улмаас хөдөлмөрийн чадвараа 2002 онд 60 хувь, 2004 онд 65 хувь сүүлдээ 75 хүртэл алдаад удалгүй нас баржээ. Нас барах хүртлээ МШӨ-ний хяналтанд эмчлэгдэж байсан гэнэ. Эрдэнэт үйлдвэр бензолтой будаг их хэрэглэдэгээс будагчид маш гүн хорддог байж. Талийгаач ажиллаж байх үедээ нэг хүүхэд төрүүлсэн нь амьгүй, чих хамаргүй гарсан гэж нөхөр нь баталжээ. МШӨ-өөр нас барсныг нь тогтоолгохоор Бүсийн оношлогоо эмчилгээний төвд задлан хийж өгөхийг хүсэхэд цаадуул нь “танай дарга нараас айгаад байна” гээд халгаасангүй. “Хос чагнуур” өрхийн эрүүл мэндийн төвийн өрхийн эмч нь амралтын өдөр гээд талийгаачийг үзэхээс цааргалан ердийн өвчнөөр нас барсан гэсэн тодорхойлолт бичиж өгч. Үүнийг нь үндэслэн Хөдөлмөр эрүүл мэндийн төв нь МШӨ-өөс шалтгаалгүй гэж батласнаас талийгаачийн гэр бүл нөхөн төлбөрөө авч чадахгүй одоо хүртэл хөөцөлдөж явна. Харин Эрдэнэт үйлдвэрийн хүн муутай дарга нар талийгаач МШӨ-өөр нас барсан эсэх нь задлан шинжилгээгээр батлагдаагүй тул үйлдвэрийн зүгээс нөхөн төлбөр өгөхгүй гээд буруу хараад суучихдаг гэнэ.
NUUTS.mn
