Нууц мэдээллийн уурхай

…Мөн манай компани огтхон ч олборлолт хийгээгүй гэж мэлзэн алт угаасан овоолго шороо хаанаас гараад ирсэнийг мэдэхгүй хэмээн зайлсхийсээр байгаад энэ хэргийг дуусгасан. Харин ч эргүүлээд хайгуулын зардал болох 1.4 тэрбумаа төрөөс нэхдэг байж. “Монгол газар” компаний овоолго руу “Шар зүлэг”, Соёл арвижих” зэрэг дөрвөн компани оржээ. “Хаан соёолж” компаний ажилтан Ш.Гансүх нь “манай дүү Өвөрхангай аймгийн Уянга сумын Бөөрөлжүүт гэдэг газарт алтны овоолготой талбай авсан “Зулмөнхбадмаараг” компаний захирал Нарантуаятай уулзсан, тэрээр “Монгол газар” компаний захирал Ц.Мянганбаяраас газар авсан гээд 60 саятөгрөг өгөөд ажилла, орон нутгийн зөвшөөрөл, шалгалтыг манайх хариуцана” гэсэн хэмээн мэдүүлжээ. Мөн “Дөлгөөн цайдам” компани 31 сая төгрөг өгөөд овоолго руу оржээ. Энэ мэтээр ээлж дараалан хэд хэдэн компани Ц.Мянганбаяр захирлын овоолго дээр жилжин найрлаж. Тэдний дунд орон нутгийн хурган дарга нарын компани ч байсан гэнэ. “Монгол газар” компаний техник ашиглалтын залбаны дарга Б.Отгон-Очир ”Мянгаа захирал над руу яриад Шийрэв гэдэг хүн чамтай холбогдоно, уулзаад асуудлыг зохицуул гэсэн, удалгүй Уянга сумын ИТХ-ын дарга Шийрэвдорж дүүгээ дагуулан ирээд газрын солбицолооо тааруулж үзсэн, тэр хоёр 30 сая төгрөг өгсөнийг компаний санхүүд тушаасан” гэжээ. Уянга сумын идэвхтэн байгаль хамгаалагч Т.Дэлгэрсайхан нь “манай сумын ЗДТГ-ын дарга Дагвасүрэн, төрийн сангийн төлөөлөгч Минжбадгар нар өөрсдөө ЖПС барьчихсан, солбицолыг нь тогтоож өгч байсан” гэж мэдүүлсэн гэнэ. Ингээд орон нутгийн дарга нар “Монгол газар” компаний овоолгод эзэн суугаад авч. Сумын малчин Туяацэцэг “би ЗДТГ-ын дарга Дагвасүрэнтэй уулзахад Минжбадгар эгч хамт байсан, Дагвасүрэн дарга чи уурхайнд хяналтын ажил хийнэ, угаасан шороог авахад нь хамт байлцаж хянаж бай, угаасан алтны хэмжээг өглөө бүр мэдээлж бай гэсэн, хэлсэнийх нь дагуу Тунгалагын уурхайд ажиллаж алтны хэмжээг Дагвасүрэн даргад хэлдэг байсан, Дагвасүрэн дарга Шийрэвдорж даргын эхнэрийн хамт өглөө бүр ирж хувиа авдаг байсан” гэж баталжээ. Орон нутгийн дарга нар алттай шороонд  гараа дүрсэнийг овоолго угаасан компаний захирлууд хүртэл гэрчлэн мөрдөн байцаалтанд нүүрийг нь улалзуулжээ. Өнөөх уурхайтай гэгдэх М.Тунгалаг нь “2013 онд манай компани үйл ажиллагаа явуулах гэхэд талбай олдохгүй байсанд Уянга сумын төрийн сангийн төлөөлөгч Минжбадгартай уулзсан, тэрээр Шийрэвдорж дарга Бөөрөлжүүтэд Бүрэгтэй гэдэг газар авсан, тэнд чи овоолго угаа гэсэн, Минжбадгар Дагвадорж нартай уулзахад шороо татаад ажилла, 45 граммаас дээш алт олборлосон тохиолдолд 30 хувийг нь бидэнд өг гэхэд нь зөвшөөрөөд орсон, тэр гуравд 57 сая төгрөг өгсөн, Дагвасүрэн, Минжбадгар, Баасансүрэн нар ирж мөнгө, хувиа авдаг, ах дүү нар нь хяналт тавьдаг байсныг манай ажилчид бүгд мэднэ” гэжээ. Энэ мэтээр сумын дарга нар “Монгол газар” компаний захирал Ц.Мянганбаяраас дутахгүйгээр дураараа дургиж төрсөн газар шороогоо ухаж сүйтгэж байжээ. Дарга нар нэгэнт өөрсдөө холбогдсон тул овоолгоо хамгаалаад сүйд болдог байж. Уянга сумын байгаль орчны улсын байцаагч Г.Гандуламыг 2013 оны 8-р сард шалгалт хийхэд “Баярсгоулд” компаний талбай дээр “Соёл арвижих” гэдэг компани ирээд буучихсан шороог нь зөөн нууранд буулгаж байжээ. Компаний захирал нь бид “Монгол газар” компаний захирал Ц.Мянганбаяр болон танай сумын ЗДТГ-ын дарга З.Дагвасүрэн, ИТХ-ын дарга Ж.Шийрэвдорж нартай хамтарч ажиллах гэрээтэй гээд шаардлагыг нь хүлээн авсангүй. Байгаль орчны улсын байцаагч “Соёл арвижих” компанийг үйл ажиллагаагаа зогсоо гэсэн биш маргааш нь ЗДТГ-ын даргадаа бангадуулжээ. З.Дагвасүрэн нь “чи яагаад зүгээр ажиллаж байгаа компанийг хөөдөг юм, Шийрэвдорж дарга бидний нэр гарлаа, битгий асуудал үүсгээд байгаарай” хэмээн бут авчээ. Ингээд  дархан хамгаалалттай болсон “Соёл арвижих”-ын араас өөр бусад компаниуд орсоор Уянга сумын Бөөрөлжүүт гэдэг сайхан нутаг өдгөө там болж үлджээ.  
                      

NUUTS.mn